Dniom 23 vieraśnia stała viadoma pra zdareńnie ŭ siaredniaj škole № 16 (pa vulicy Biruzova). Tam zabili 13-hadovaha padletka.
Va Upraŭleńni Śledčaha kamiteta pa h. Minsku paviedamili, što trup niepaŭnaletniaha z kołata-rezanym ranieńniem u vobłaści hrudziej byŭ znojdzieny siońnia ŭ Frunzienskim rajonie. Pakul dakładna nie paviedamlajecca, dzie mienavita adbyłosia złačynstva i dzie było znojdziena cieła. U škole što-niebudź kamientavać admovilisia:
«Prabačcie, kali łaska, ale tut takaja situacyja, što my nie možam z vami hutaryć.
Jak paviedamili ŭ Śledčym kamitecie, pa haračych śladach supracoŭnikami ŭpraŭleńnia kryminalnaha vyšuku Frunzienskaha RUUS byŭ zatrymany padazravany ŭ ździajśnieńni złačynstva. Im akazaŭsia małady čałaviek 1994 hoda naradžeńnia.
Matyvy złačynstva vyśviatlajucca, raspačata kryminalnaja sprava pa fakcie zabojstva pry abciažvajučych abstavinach.
Dla pracy pa spravie stvorana śledčaja hrupa ź liku najbolš daśviedčanych supracoŭnikaŭ upraŭleńnia. Śledča-apieratyŭnaja hrupa ŭžo praviała ahlad miesca zdareńnia z udziełam śpiecyjalistaŭ Dziaržaŭnaha kamiteta sudovych ekśpiertyz, a taksama šerah inšych ahladaŭ, u chodzie jakich vyjaŭlenyja i kanfiskavanyja pradmiety, jakija majuć dokaznaje značeńnie pa spravie.
