Sud Bresckaha rajona 23 vieraśnia vynies prysud Vitalu Kaŭšu za arhanizacyju niezakonnaj mihracyi.
Jak paviedamiŭ pamočnik prakurora Bresckaha rajona Alaksandr Płyšeŭski, jaki padtrymlivaŭ dziaržaŭnaje abvinavačańnie pa spravie, Koŭš abvinavačvaŭsia ŭ tym, što pa papiaredniaj zmovie ź inšaj asobaj, kryminalnaja sprava ŭ dačynieńni da jakoj vydzielena ŭ asobnuju vytvorčaść, z metaj niezakonnaj mihracyi zamiežnych hramadzian na terytoryju Polščy spłanavaŭ i arhanizavaŭ niezakonny ŭjezd u Biełaruś z Rasii vaśmi hramadzian Indyi.
Zamiežnyja hramadzianie prybyli na terytoryju Biełarusi 6–7 maja 2012 hoda. Paśla hetaha hramadzianie Indyi byli pieraviezienyja ŭ viosku Ciuchiničy Bresckaha rajona, dzie było arhanizavana ich ukryvalnictva ŭ domie pa miescy žycharstva Kaŭša.
Pamiž 7 hadzinami 14 maja i hadzinaj nočy 15 maja hramadzianie Indyi byli dastaŭlenyja ŭ lasny masiŭ, što pablizu zastavy «Ciarebuń», dzie Koŭš ź inšaj asobaj zabiaśpiečyli nielehałaŭ rečavymi miaškami i nieabchodnymi prystasavańniami dla niezakonnaha pierasiačeńnia miažy.
Za stvały dreŭ byŭ zamacavany mietaličny tros, paśla čaho z vykarystańniem mantažnych pajasoŭ hramadzianie Indyi byli pieramieščanyja nad sihnalizacyjnym kompleksam dla dalejšaha nakiravańnia ŭ Polšču.
U vyniku supraćpraŭnych dziejańniaŭ siem indyjcaŭ byli pierapraŭlenyja na niejtralnuju terytoryju miažy Biełarusi i Polščy. Paśla ŭsie vosiem parušalnikaŭ byli zatrymanyja pahraničnym naradam.
Pavodle słoŭ dziaržabvinavaŭcy, sud Bresckaha rajona pryznaŭ Kaŭša vinavatym u arhanizacyi niezakonnaha ŭjezdu na terytoryju Biełarusi, znachodžańnia na terytoryi Biełarusi i vyjezdu ź Biełarusi zamiežnych hramadzian, učynienaj hrupaj asob pa papiaredniaj zmovie (na padstavie č. 2 art. 371–1 KK) i pryhavaryŭ da čatyroch hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu z kanfiskacyjaj majomaści.
Prysud nie nabyŭ zakonnuju moc i moža być abskardžany.
«U sudovym pasiadžeńni Koŭš svajoj viny nie pryznaŭ», — skazaŭ Płyšeŭski. Jon nahadaŭ, što 12 sakavika sud Bresckaha rajona taksama pryznaŭ Kaŭša vinavatym na padstavie č. 2 art. 371–1 Kryminalnaha kodeksa i pryhavaryŭ da takoha ž pakarańnia. Abvinavačvany abskardziŭ prysud. 30 krasavika sudovaja kalehija pa kryminalnych spravach Bresckaha abłasnoha suda, razhledzieŭšy kasacyjnuju skarhu i materyjały spravy, admianiła prysud rajonnaha suda.
Kryminalnaja sprava była pieradadzienaja ŭ sud Bresckaha rajona na novy razhlad.
