Biełaruski cemient pradajecca ŭ Rasii tańniej, čym na ŭnutranym rynku. Takija źviestki manitorynhu cen, praviedzienaha Jeŭrazijskaj ekanamičnaj kamisijaj. Nadnacyjanalny orhan Mytnaha sajuza prapanuje stvaryć śpiecyjalnuju kamisiju, kab pravieryć biełaruskich vytvorcaŭ na pradmiet dempinhu.
«Na transhraničnym rynku cemientu siaredniaja roźničnaja adpusknaja cana na adzin i toj ža pradukt biełaruskaj vytvorčaści vyšejšaja ŭ Biełarusi, čym u Rasii. U suviazi z hetym rekamiendavana sfarmavać pracoŭnuju hrupu z udziełam pradstaŭnikoŭ JEEK i antymanapolnaha orhana RB dla dalejšaj raboty pa analizie i vyjaŭleńni ŭdzielnikaŭ rynku cemientu pa ŭsim „łancužku“ — ad vytvorčaści da kančatkovaj realizacyi», — zajaviŭ 20 vieraśnia člen kalehii (ministr) pa kankurencyi i antymanapolnym rehulavańni JEEK Nurłan Ałdabierhienaŭ.
Zrešty, pretenzii da biełaruskaha cemientu z boku rasijskich hulcoŭ byli čakanyja.
Bo kali iranski cemient, na jaki apałčylisia rasijanie i kazachi (razam ź biełarusami), pradajecca ŭ RF pa 80 dalaraŭ za tonu (rasijski — za 120 dalaraŭ), to biełaruskija eksparciory, pavodle dadzienych Biełstata, zbyvajuć svaju pradukcyju ŭ RF pa 70 dalaraŭ. Pryčym, kali siarednija ceny na rasijskim rynku ŭpali ŭ hetym hodzie na 10%, to biełaruski cemient u Rasii patańnieŭ na 15%.
Spačatku rasiejcy sprabavali damovicca z sajuźnikam paluboŭna, prapanoŭvajučy Minsku dobraachvotna abmiežavać dempinhavyja pastaŭki ŭ RF.
«Uvieś lipień i pačatak žniŭnia ŭ Minsku išli pieramovy Minbudarchitektury, kiraŭnictva cemientnych zavodaŭ Biełarusi i instytuta NIPTIS z pradstaŭnikami rasijskaha chołdynhu"Jeŭracemient hrup». Hałoŭnaja tema hetych sustreč — vyznačyć kvotu na harantavanuju pastaŭku ajčynnaha cemientu ŭ Rasiju. U pratakoł ab namierach u vyniku była ŭpisana ličba 50 000 ton na miesiac dla kožnaha z našych (troch) zavodaŭ. Ale jana pa-raniejšamu nie kančatkovaja. Pieramoŭny praces praciahvajecca… », — paviedamlała hazieta «Respublika» 28 žniŭnia.
Jak bačym, da kampramisu pryjści nie ŭdałosia, niahledziačy na toje, što prapanavanaja kvota ŭ 1,8 młn. ton na hod vyšejšaja za tyja 1,5 młn, jakija Biełaruś źbirajecca ekspartavać u RF u hetym hodzie.
Ale, pa-pieršaje, u nastupnym hodzie, kali novyja linii ŭ Krasnasielskim, Kaściukovičach i Kryčavie vypuściać dadatkovyja 3 młn ton, ciapierašnija damoŭlenaści ŭsio roŭna stracili b aktualnaść.
Pa-druhoje, vieraśnioŭskaje abvastreńnie cemientnych supiarečnaściaŭ moža być źviazana i z aryštam 26 žniŭnia ŭ Minsku hienieralnaha dyrektara «Urałkalija» Uładzisłava Baŭmhiertniera. Bo ŭładalnik «Jeŭracemient hrup» Fiłaret Halčaŭ źjaŭlajecca bujnym minarytaryjem «Urałkalija» i šmathadovym dziełavym partnioram Sulejmana Kierymava.
Ale jakimi b ni byli matyvy kanfliktu, pierśpiektyvy dla biełaruskaj cemientnaj haliny vyhladajuć nie viesieła.
Na dadzieny momant 93% biełaruskaha ekspartnaha cemientu idzie ŭ Rasiju. Pa vynikach hoda vyručka ad hetych prodažaŭ pavinna skłaści kala 100 młn dalaraŭ, a ŭ nastupnym čakajecca 300 młn dalaraŭ.
Kali rasśledavańnie JEEK pryviadzie da prypynieńnia hetaha kanała ci chacia b da jaho abmiežavańnia da ciapierašnich ramak, heta budzie aznačać nie prosta ŭpuščanyja mahčymaści.
Bo ekspartnyja pastupleńni pavinny byli iści na pahašeńnie paŭmiljardnaha kitajskaha kredytu, układzienaha ŭ pašyreńnie cemientnaj vytvorčaści.
