25 vieraśnia sapioram daviałosia vyjazdžać pa vykliku na stancyju minskaha mietro «Traktarny zavod», bo tam była vyjaŭlenaja biezhaspadarnaja skrynka. Evakuacyja pasažyraŭ nie spatrebiłasia.
«U milicyju pastupiła paviedamleńnie ab biezhaspadarnaj skryncy na stancyi mietro „Traktarny zavod“.
Sapiory znajšli ŭ joj… jabłyki. Mietro pracavała ŭ narmalnym režymie»,
— napisaŭ u akaŭncie HUUS Minharvykankama ŭ Tvitary pres-sakratar staličnaj milicyi Alaksandr Łastoŭski.
U apošnija dni minskaje mietro prykoŭvaje da siabie pavyšanuju ŭvahu.
24 vieraśnia tam biez papiaredžańnia haradžan pravodzilisia antyterarystyčnyja vučeńni MUS z dahladam pasažyraŭ, evakuacyjaj, zakryćciom stancyj. A 25 vieraśnia supracoŭniki MNS likvidavali nastupstvy karotkaha zamykańnia ŭ elektraščycie na stancyi «Uschod».
