Viadomy rasijski šachmatyst, były čempijon śvietu, a ciapier apazicyjny palityk Hary Kasparaŭ prosić dać jamu łatvijskaje hramadzianstva.

Taki list atrymali amal usie frakcyi łatvijskaha Siejma.

Jak paviedamiŭ staršynia kamisii Siejma pa abaronie, unutranych spravach i praduchileńni karupcyi Ajnar Łatkoŭskis, hramadzianstva Łatvii Kasparaŭ prosić za asablivyja zasłuhi i choča zachavać taksama hramadzianstva Rasii.

«Jak hramadzianin Łatvii ja atrymaju mahčymaść biez abmiežavańniaŭ zaniacca palityčnaj dziejnaściu ŭ imia demakratyi, miru i spraviadlivaści jak u Rasii, tak i ŭ inšych krainach śvietu, dzie parušajuć pravy čałavieka i topčuć demakratyčnyja normy», - cytuje list Kasparava BNS.

Kasparaŭ ukazvaje, što jaho žyćcio z maładości źviazana z Łatvijaj,

dzie ŭ 1970-ja hady jon atrymaŭ važnuju pieramohu ŭ šachmatach [vidać, razmova pra adboračny turnir u Daŭhaŭpiłsie, jaki dazvoliŭ 15-hadovamu šatmatystu debiutavać u čempijanacie SSSR — NN]. Maci jaho syna Vadzima hramadzianka Łatvii, a ŭ syna jość vid na žycharstva ŭ Łatvii, i jon rehularna naviedvaje Ryhu.

Kasparaŭ taksama piša, što jon jak hramadzianin Łatvii moh by ŭnieści istotny ŭkład u adukacyju školnikaŭ i studentaŭ u ramkach prahram «šachmatnaha Fondu Kasparava».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?