5 listapada ŭ straŭni «Kamianica» «Stary Olsa» zładziŭ pres-kanfierencyju z nahody vychadu novaha albomu.

Pavodle zasnavalnika i lidara hurtu Źmitra Sasnoŭskaha, za piać hadoŭ, pakul muzyki nie vybiralisia da studyi, u ich nazapasiłasia šmat cikavaha materyjału.

Razam z tym, bahata čaho źmianiłasia ŭ lepšy bok, u tym liku i ŭ płanie mahčymaściaŭ dla hukazapisu. U pryvatnaści, svoj novy albom «Santa Maria» hurt zapisaŭ u minskaj studyi «Sound Flowers», raźmieščanaj nie aby-dzie, a ŭ Šabanach. Źviadzieńnie ž zapisu adbyvałasia ŭ pryvatnaj studyi ŭ Homieli.

Darečy, heta pieršy albom u historyi hurtu, zapisany ŭłasnymi vysiłkami, biez udziełu pradziusaraŭ i meniedžaraŭ, što, adnak, ani adbiłasia na jakaści zapisu – uražańni samyja najlepšyja.

Napracavany piacihadovy materyjał tematyčna padzieleny na dźvie častki. Pieršaja, jakaja i ŭtvaraje źmiest novaha albomu, składajecca z aŭtarskich tvoraŭ siaredniaviečnych kampazitaraŭ. Da druhoj častki adnieśli rycarskija i zastolnyja pieśni, jaje płanujecca vydać asobnym albomam na pačatku nastupnaj vosieni.

Dahetul za ŭsiu historyju hurtu ŭ tvorčym arsienale muzykaŭ byli tolki dva relihijnyja tvory. Jašče adnoj asablivaściu novaha albomu jość toje, što ŭ jaho ŭvašli dźvie novyja pieśni relihijnaha kštałtu: «Ave Maria» («Zaśpiavaj adzinaj Pańnie»,15 st.) i «Maci Karaleva» («Santa Maria», 13 st.), apošniaja ź jakich i dała nazvu albomu.

Nie zvažajučy na roznyja pohlady i prychilnaści ŭdzielnikaŭ hurtu, nadalej budzie ŭdzialacca adpaviednaja i naležnaja ŭvaha rekanstrukcyi duchoŭnaj muzyčnaj spadčyny, jakoj nasamreč zachavałasia našmat bolš, čym śvieckaj muzyki.

Udzielniki raskazali i pra prykmietnuju evalucyju ŭ płanie zasvajeńnia vykanańnia staradaŭniaj muzyki, napracavanuju ciaham šmathadovych vystupaŭ i sustrečaŭ z muzykami z roznych krainaŭ.

Kožny časavy muzyčny pieryjad maje ŭłasnuju stylistyčnuju hukavuju i ładavuju asablivaść. Adnak, na dumku spadara Źmitra Sasnoŭskaha, stroha aŭtentyčnaje vykanańnie moža być nie zusim prychilna ŭspryniataje i zrazumietaje paspalitymi słuchačami.

Aprača hetaha, «Stary Olsa» čaściakom źviartajecca da impravizacyjaŭ i varyjacyjaŭ vakoł muzyčnaje temy, što, nie ŭ apošniuju čarhu dziakujučy bubnaču, čaściakom vyznačajuć jak «siaredniaviečny rok-n-roł».

Na pytańnie žurnalistaŭ, ci płanuje hurt rabić pierakłady tvoraŭ sa svajoj prahramy na rasiejskuju movu, adkaz byŭ admoŭnym. U samich rasiejcaŭ na samaj spravie bahataja muzyčnaja spadčyna, ale jany čamuści pieradusim akcentujuć uvahu na kazackich śpievach i viaskovym falkłory.

Ichniaja ŭvaha da Siaredniaviečča nie siahaje dalej kłasicyzmu, dyj toje adno ŭ miežach akademičnych kołaŭ. Pry hetym rasiejskaja hramada vielmi ŭdziačna reahuje na tvorčaść «Staroha Olsy»: muzyki byli ščyra ŭražanyja, kali na kancercie va Uljanaŭsku maładziony tančyli i impetna padpiavali biełaruskija śpievy.

Tamu ŭ pierśpiektyvie, kali i budzie padrychtavanaja pieśnia pa-rasiejsku, to heta budzie ŭłasna rasiejski siaredniaviečny tvor – u jakaści ekśpierymientu i dakoru našym uschodnim susiedziam.

Taksama byŭ zhadany i słavuty łacinamoŭny «Himn studentaŭ» (Gaudeamus), jaki stvaraŭsia ŭ korčmach i haradskich placach jak himn bieskłapotnaha adpačynku i viesiałości, a ŭ naš čas čamuści śpiavajecca ŭ akademičnych ustanovach.

Pačuć jaho ŭ apracoŭcy i vykanańni muzykaŭ taksama možna budzie padčas kancertu.

***

Nahadajem, što prezientacyja novaha albomu hurtu «Stary Olsa» adbudziecca 17 listapada a 19-aj hadzinie ŭ DK MAZ.

Košt kvitkoŭ – ad 70 da 120 tys. rubloŭ. Daviedki pa telefonie: 375 29 649 08 88.

 

 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?