15 listapada ŭ Čyrvonym kaściole ŭ Minsku adkryłasia II ahulnabiełaruskaja sustreča katalickich śviataroŭ. Sustreča pravodzicca na zakančeńnie Hoda viery, abvieščanaha ŭ Katalickim Kaściole jašče papiarednim Papam Bieniedyktam XVI, i maje nazvu «Lumen fidei – fidelitas sacerdotalis» («Śviatło viery — śviatarskaja viernaść»).
Da ŭdzielnikaŭ sustrečy źviarnuŭsia Apostalski Nuncyj u Biełarusi arcybiskup Kłaŭdya Hudžeroci. Arcybiskup pryznaŭsia, što dla jaho vialiki honar być u hety dzień razam ź biełaruskim śviatarstvam. Pradstaŭnik Papy vykazaŭ nadzieju, što sustreča, asabliva praca ŭ hrupach, «dapamoža vyjavić, u čym našy prablemy i dzie naša nadzieja».
santabanta.org
Apostalski Nuncyj raspavioŭ prysutnym ab svajoj sustrečy ŭ Rymie z Papam Franciškam, ab tym, što zapytaŭsia ŭ jaho Pantyfik i što prasiŭ pieradać duchavienstvu ŭ Biełarusi.
Pieršym pytańniem, jakoje pastaviŭ Papa, było: «Jakija śviatary ŭ Biełarusi?» Śviaty Ajciec pytaŭsia taksama: «Ci bahatyja jany?», a paśla dadaŭ. što «ŭ duchavienstvie nie pavinna być bolš bahatych i biednych». Pa słovach arcybiskupa, Śviaty Ajciec pytaŭsia, «ci źjaŭlajucca hetyja śviatary prapaviednikami Božaj miłasernaści, abo jany surovyja da ludziej i imknucca pakazać, nakolki ludzi hrešnyja?». Słovami Pantyfika było: «Ci nie byli biełarusy ŭ svajoj historyi zanadta žorstka traktavanyja, kab jašče i śviatary byli da ludziej žorstkimi padčas spoviedzi?»
Arcybiskup Kłaŭdyjo Hudžeroćci pieradaŭ prysutnym taksama nastupnyja słovy Papy:
«Ja nie bajusia za śviataroŭ, jakija robiać pamyłki, jakija słabyja, časami padajuć, — ja bajusia śviataroŭ karumpavanych, jakija zvonku zdajucca pryhožymi, ale ŭnutry poŭnyja brudu.
Hetyja śviatary pieratvarylisia ŭ funkcyjanieraŭ, i, mahčyma, jany ŭžo ni ŭ što nie vierać». Pačynajecca z taho, što «jany bolš nie molacca, a zatym hublajuć adroźnieńnie dabra ad zła ŭ svaim sumleńni».
«Papa Francišak havoryć vielmi prosta. ale vielmi jasna i adnaznačna», — adznačyŭ Apostalski Nuncyj.
Pa słovach ijerarcha, Pantyfik padkreśliŭ: «Nam patrebnyja śviatary, hodnyja naroda, jaki pakutavaŭ».
Śviaty Ajciec, jak skazaŭ arcybiskup, paprasiŭ pieradać śviataram i biskupam Biełarusi, «kab jany išli razam», «havaryli pamiž saboj, adkryli sercy adzin adnamu, bo ŭ Kaściole niama hienierała i radavoha - jość tolki braty».
Pradstaŭnik Papy dadaŭ, što kožnamu ź biełaruskich śviataroŭ Pantyfik prasiŭ pieradać svajo błasłaŭleńnie i abniać kožnaha ź ich.
