Ministr zamiežnych spraŭ Biełarusi Uładzimir Makiej 19 listapada naviedaje z rabočym vizitam Maskvu dla ŭdziełu ŭ sumiesnym pasiadžeńni kalehij MZS Biełarusi i Rasii.
Jak paviedamlaje pres-słužba biełaruskaha MZS, na pasiadžeńni płanujecca padvieści vyniki realizacyi Prahramy ŭzhodnienych dziejańniaŭ u śfiery źniešniaj palityki dziaržaŭ — udzielnic Dahavoru ab stvareńni Sajuznaj dziaržavy na 2012—2013 hady, a taksama razhledzieć i pryniać prajekt anałahičnaj prahramy na 2014—2015 hady, jakaja budzie pradstaŭlena na zaćviardžeńnie Vyšejšaha dziaržsavieta Sajuznaj dziaržavy. Aprača taho, buduć abmierkavanyja pytańni źniešniepalityčnaha supravadžeńnia jeŭrazijskaj intehracyi i ŭzajemadziejańnia ŭ śfiery abarony intaresaŭ hramadzian i jurydyčnych asob Biełarusi i Rasii ŭ trecich krainach.
Ministry zamiežnych spraŭ padpišuć płan kansultacyj pamiž źniešniepalityčnymi viedamstvami Biełarusi i Rasii na 2014 hod.
Padčas vizitu praduhledžana praviadzieńnie rabočaj sustrečy Uładzimira Makieja ź jaho rasijskim kaleham Siarhiejem Łaŭrovym. Ministry płanujuć abmierkavać aktualnyja pytańni biełaruska-rasijskaha supracoŭnictva i abmianiajucca dumkami «pa temach mižnarodnaha paradku dnia, što ŭjaŭlajuć uzajemnuju cikavaść», havorycca ŭ paviedamleńni MZS.
