U Jeŭrapiejskim humanitarnym univiersitecie nie ścichajuć sprečki nakont budučyni adukacyjnaj ustanovy. Niadaŭna vykładčyki, nie zhodnyja z palitykaj kiraŭnictva ŭniviersiteta, stvaryli płatformu «Za novy EHU», jakaja budzie imknucca znoŭ zrabić EHU «efiektyŭnym biełaruskim humanitarnym vnu ź jeŭrapiejskaj jakaściu adukacyi i navukovaj pracy».
Płatforma była stvoranaja napiaredadni vybaraŭ u Sienat univiersiteta, jakija majuć adbycca 19 listapada. Siońnia pres-słužba ŭniviersiteta raspaŭsiudziła paviedamleńnie rektara Uładzimira Michajłava pad nazvaj «Źmieny harantujuć jakaść u EHU», u jakim apisvaje zapłanavanyja kroki pa madernizacyi ŭniviersiteta. «NN» pryvodzić tekst paviedamleńnie całkam.
«Jeŭrapiejski humanitarny ŭniviersitet budzie ŭkładać bolš u kaściak pastajannych vykładčykaŭ i klučavyja prahramy. Pavodle rektara EHU Anatola Michajłava, hetyja miery dazvolać padvysić jakaść i pavialičyć upłyŭ prahram i daśledavańniaŭ EHU, a taksama palepšyć pracoŭnyja ŭmovy ŭ EHU.
«Metaj našych reform jość kansalidacyja našaha vykładčyckaha składu i stvareńnie pastajannaha jadra vykładčykaŭ, što całkam pryśviačajuć siabie navučańniu našych studentaŭ i praviadzieńniu vysakajakasnych i ŭpłyvovych navukovych daśledavańniaŭ dy inšych prahram, – kaža Michajłaŭ. – My pieraadoleli šmatlikija vykliki, kab stacca tym, čym my jość siońnia, i my z poŭnym pravam možam hanarycca, adnak jašče nie čas na adpačynak. My musim uvieś čas imknucca padvyšać jakaść našaj pracy».
U miežach płana pa stvareńni pastajannych vykładčyckich pasadaŭ va ŭniviersitecie biudžet zarobku vykładčykaŭ budzie padvojeny. Kab naniać vykładčykaŭ na hetyja pasady, budzie praviedzieny prazrysty, usioachopny i kankurentny praces naboru piersanału.
Rektar pryznaje, što prapanavanaja «madernizacyja» nie jość lohkaj zadačaj i što ideja zładzić kankurentny praces naboru piersanału vyklikaje peŭnyja piarečańni z boku niekatorych čalcoŭ vykładčyckaj supolnaści. Adnak, kali ŭsio pojdzie zhodna z płanam, da pačatku 2014/15 navučalnaha hoda EHU budzie ŭkamplektavany jadrom asnoŭnych vykładčykaŭ, jakija žyvuć u Litvie i majuć pracoŭnyja damovy z univiersitetam razam z usimi sacyjalnymi harantyjami pavodle zakonaŭ Litoŭskaj Respubliki.
«Siarod univiersitetaŭ rehijona my adny ź pieršych skarystalisia mahčymaściami kamunikacyi, jakija prapanujuć novyja miedyi. Faktyčna my viadomyja jak rehijanalny lidar u śfiery raźvićcia anłajn-adukacyi, — adznačaje Michajłaŭ. — Ale, jak heta pryznajuć navat takija suśvietna viadomyja internet-kampanii, jak Yahoo, kab dasiahnuć pośpiechu, arhanizacyja nie moža być całkam virtualnaj. Kab pracavać efiektyŭna jak kamanda, my musim bolš raźvivać žyvuju kamunikacyju pamiž našymi supracoŭnikami i sa studentami. Takim čynam, my budziem vystaŭlać patrabavańnie, kab asnoŭnyja vykładčyki žyli ŭ Vilni».
U adroźnieńnie ad niekatorych krytykaŭ prapanavanych źmienaŭ, Michajłaŭ nie razhladaje ciapierašniuju situacyju jak pahrozu ci kryzis.
«Raniej my ŭžo sutykalisia z tym, što možna nazvać realnaj pahrozaj, i my jaje pieraadoleli. Našaje ciapierašniaje stanovišča — absalutna inšaha kštałtu.
Dziakujučy ščodraj i sistematyčnaj padtrymcy fundataraŭ, našaje finansavaje stanovišča spryjalnaje jak nikoli.
I choć my musim štohod nanova paćviardžać fundataram istotnaść našaj spravy, nam paščaściła mieć addanuju mižnarodnuju hrupu fundataraŭ, jakija razumiejuć, što naš prajekt — doŭhaterminovy i vymahaje doŭhaterminovych układańniaŭ».
Hetaksama my nie płanujem admovicca ad biełaruskaha charaktaru i skiravanaści ŭniviersiteta. Zapłanavanyja źmieny jość chutčej narmalnym adkazam na vyklik pa zachavańni i ŭzmacnieńni jakaści vykładańnia.
«My musim być samakrytyčnymi i pryznać, što nie ŭsie našyja prahramy paśpiachova dasiahajuć pažadanaj jakaści, u tym liku z-za pierapynku, paŭstałaha z pryčyny hvałtoŭnaha zakryćcia ŭniviersiteta ŭ Minsku i pierajezdu ŭ Vilniu. Palitałohija i biełarusistyka – heta ŭ pryvatnaści tyja dźvie prahramy, jakija nie spraŭdzili čakańniaŭ i ŭ vyniku sutyknulisia ź niedastatkovym naboram, — pryznaje Michajłaŭ. — Unutranaja rearhanizacyja jość častkaj našych pastajannych sprobaŭ padvysić jakaść adukacyi ŭ EHU, u pryvatnaści ŭ hetych halinach. Adpaviedna, palitałohija niadaŭna była całkam abnoŭlenajai budzie adkrytaja ŭ nastupnym hodzie jak «Suśvietnaja palityka i ekanomika». My taksama raspracoŭvajem novuju inicyjatyvu, jakaja zasiarodzicca na daśledavańni transfarmacyj i na tym, jakija ŭroki ź ich moža vynieści Biełaruś. Što my možam zrabić dla adradžeńnia biełarusistyki — heta jašče adna ciapierašniaja zadača, jakuju my abaviazujemsia vyrašać».
U adkaz na krytyku kiravańnia EHU, jakaja niadaŭna prahučała ŭ biełaruskich ŚMI, Michajłaŭ zaŭvažaje:
«Našaja struktura, jak vyznačana ŭ Statucie, zmadelavanaja pavodle idei pryciahnieńnia zacikaŭlenych asobaŭ, raździaleńnia ŭładaŭ i padspravazdačnaha demakratyčnaha kiraŭnictva. Funkcyja kiravańnia nie skancentravanaja ŭ niejkim adnym orhanie — naprykład, Sienacie, asnoŭnaj zadačaj jakoha jość zabieśpiačeńnie jakaści adukacyi i navukovych daśledavańniaŭ — ale padzielenaja pamiž niekalkimi orhanami. Hetyja orhany — mižnarodnaja Kiraŭničaja Rada, što składajecca ź mižnarodnaj hrupy ekśpiertaŭ u halinie adukacyi i ŭ skład jakoj uvachodzić i pradstaŭnik Sienata EHU; Trastavy Fond EHU (Kapienhahien), jakim kiruje vysokašanoŭnaja Rada ministraŭ Paŭnočnych krain i jaki rasparadžajecca achviaravańniami na ŭniviersitet; rektarat; Vykanaŭčaja Rada; a taksama Sienat, jaki funkcyjanuje niezaležna, adkazvaje za zabieśpiačeńnie akademičnaj jakaści i maje pradstaŭnikoŭ nie tolki ŭ Kiraŭničaj Radzie, ale taksama i ŭ Vykanaŭčaj Radzie».
Michajłaŭ adznačaje, što padobnaja struktura jość nie tradycyjnaj, a hibrydnaj, što, pa mierkavańni zasnavalnikaŭ EHU, zabiaśpiečvaje efiektyŭnaje kiravańnie i zładžanaść, nie achviarujučy pradstaŭničaściu.
«Ja razumieju, što niekatoryja asoby ŭ našym univiersitecie chacieli b zasiarodzić usiu ŭładu ŭ rukach adnaho Sienata, adnak u rečaisnaści heta budzie našmat mienš demakratyčny i mienš inkluziŭny varyjant, čym ciapierašniaja struktura, jakaja dazvalaje nam pryciahvać inšych zacikaŭlenych asobaŭ i daradcaŭ da pracesu pryniaćcia rašeńniaŭ i dapamahaje zabiaśpiečyć bolš uzhodnienuju palityku», — śćviardžaje Michajłaŭ.
Datyčna čutak pra toje, što biełaruskija navukoŭcy buduć zamianiacca pradstaŭnikami inšych nacyjanalnaściaŭ, Michajłaŭ padkreślivaje, što Biełaruś jość i zaŭždy zastaniecca ŭ centry ŭvahi EHU i što zaŭždy viadziecca aktyŭny pošuk kandydataŭ ź Biełarusi.
«U kožnym z vypadkaŭ my robim usio, kab znajści dobrych kandydataŭ ź Biełarusi na pasady ŭ EHU. U nas było niekalki takich kandydataŭ na pasadu kiraŭnika Departamienta historyi. Ale adnačasna my majem abaviazak pierad našymi studentami i hramadskaściu — dasiahać vysokaj jakaścii ŭ vykładańni, i ŭ navukovych daśledavańniach. Kab hetak adbyvałasia, my musim abirać najlepšych u svajoj halinie — biełarusaŭ, kali heta mahčyma, ale časam taksama i inšych, jakija mohuć nam dapamahčy vykonvać našuju misiju. Ja pierakanany, što źmieny, jakija my ažyćciaŭlajem pry padtrymcy šyrokaj mižnarodnaj kaalicyi zacikaŭlenych asobaŭ, pavialičać uniosak EHU ŭ lepšuju budučyniu Biełarusi i biełarusaŭ».
