12 listapada, u dzień aficyjnaha vychadu ŭ śviet novaj hulni «World of Warplanes» ad stvaralnika znakamitych «tančykaŭ», u siecivie źjaviłasia biełarusizacyja dla hetaj hulni — admysłovaja madyfikacyja, jakuju zrabiła pierakładnickaje tavarystva MTH «ReZervacyJa».
Heta moładzievaja tvorčaja hramada — niefarmalnaja supołka maładych ludziej, jakija na dobraachvotnaj asnovie lakalizujuć papularnyja kamputarnyja hulni. Kaściak składajuć 4 chłopcy, paviedamlaje radyjo «Svaboda».
«Uvohule, «ReZervacyJa» isnuje z 2004 hodu i pačynałasia jak supołka pierakładčykaŭ filmaŭ. Adnak praź niekatory čas my zrazumieli, što nia musim pierakładać niejki art-chaŭz ci inšuju intelektualščynu, tamu što asnoŭnaja prablema ŭ Biełarusi — heta niastača biełaruskamoŭnaj pop-kultury.
Adzin z asnoŭnych składnikaŭ moładzievaj pop-kultury — heta kamputarnyja hulni. A siarod hulniaŭ samaja papularnaja siońnia nia tolki ŭ Biełarusi, ale i ŭ śviecie — hulnia «World of Tanks».
U Biełarusi letaś naličvałasia 100 tysiač hulcoŭ u «World of Tanks», u śviecie ŭ jaje hulaje 60 miljonaŭ čałaviek. Tamu my jaje i pierakłali jašče ŭ kancy 2012 hodu», — kaža pierakładčyk Alaksandar Šumski, jaki pracuje systemnym administrataram u adnoj z barysaŭskich firmaŭ.
Adzin z zasnavalnikaŭ MTH «ReZervacyJa» i jaje idejny natchnialnik Siaržuk Ušaŭ kaža, što čym by ni zajmałasia hramada, element pašyreńnia nacyjanalnaj movy i jaje raspaŭsiud zaŭsiody byli siarod pryjarytetaŭ dla jaje siabraŭ.
«World of Tanks» i «World of Warplanes» — heta pradukty mižnarodnaj karparacyi «Wargaming», zasnavalnik jakoj — biełarus Viktar Kisły. Ciapier raspracoŭščyki hulni pracujuć u roznych krainach śvietu.
Pierakłady na biełaruskuju movu abiedźviuch hulniaŭ, zroblenyja «ReZervacyjaJ», — nieaficyjnyja. Heta značyć, što ŭ standartny nabor funkcyjaŭ hulni biełaruskaja mova nie ŭvachodzić. Tamu, kab atrymać biełarusizacyju hulni, na jaje forumie treba spampavać admysłovy fajł.
«My sprabavali skantaktavacca z kiraŭnictvam «Wargaming» nakont aficyjnaj biełaruskaj versii hulni, publikavali adkryty zvarot. Tym bolš što na ich forumie było vielmi šmat zapytaŭ pra biełaruskamoŭnuju i ŭkrainskamoŭnuju versii.
Dzieści praz hod paśla zvarotu pryjšoŭ adkaz pra toje, što biełaruskaja mova nie planujecca, — apaviadaje Alaksandar Šumski. — Tady my vyrašyli zrabić pierakład svaimi siłami, paralelna damahajučysia ŭklučeńnia jaho ŭ hulniu ci stvareńnia padobnaha siłami «Wargaming»».
«Heta vielmi dziŭna, što kiraŭnictva «Wargaming» nie pajšło nam nasustrač i nie pahadziłasia na stvareńnie aficyjnaj biełaruskaj versii, — kaža Siaržuk Ušaŭ. — Tak i nie zrazumieli, čamu jany supraciŭlajucca dosyć prostaj spravie, u jakoj my im, da ŭsiaho, prapanujem biaspłatnuju dapamohu.
Sprava ŭ tym, što sa svajho boku my prapanavali im pieradaču vynikaŭ našaj pracy, jakaja zaklučałasia ŭ tym, što my pieračytali vialiki płast litaratury, kab znajści cikavyja biełaruskija terminy. U mianie niama adkazu, čamu jany tak reahujuć», — kaža Siaržuk Ušaŭ.
Ciapier, kab znajści pierakłady hulniaŭ, dastatkova zadać adpaviedny zapyt u siecivie, paśla spampavać na aficyjnym forumie «Wargaming» fajły tak zvanych «modaŭ» u raździele, dzie raźmiaščajucca madyfikacyi da hetaj hulni.
«Vyhladaje, što dla kiraŭnictva «Wargaming» niama roźnicy, jakaja mienavita madyfikacyja vystaŭlajecca na forum. Tam šmat madyfikacyjaŭ, pry dapamozie jakich možna ŭnosić źmieny ŭ hulniu.
Heta moža być źmiena koleru, kamuflažu, ci času sutak, u jaki adbyvajecca boj, inšy vyhlad meniu ci, jak u našym vypadku, inšaja mova», — kaža Alaksandar Šumski.
Ahučvali hulniu chłopcy samastojna, dapamahaŭ im viadomy biełaruski metał-muzyka — frontmen hurtu «Gods Tower» Łeśli Najf.
«U vyniku źjaŭleńnia biełarusizacyi hulniaŭ usie meniu, a taksama huki i kamentary hučać pa-biełarusku. Navat łajanka. Naprykład, u «World of Tanks» dzieści z paŭsotni biełaruskich praklonaŭ. Tankisty — jany ž ludzi surovyja, biaz mocnaha słova nia mohuć», — raspaviadaje Alaksandar Šumski.
Apošniuju madyfikacyju hulni «World of Tanks» ź pierakładam na biełaruskuju movu, jakaja vyjšła 10 kastryčnika 2013 hodu, užo spampavali 720 razoŭ z sajtu «ReZervacyJa» i 116 razoŭ z aficyjnaha sajtu hulni.
A pierakład «World of Warplanes» za 2 dni spampavali kala 100 čałaviek. Ale Alaksandar Šumski pierakanany, što realnaja kolkaść tych, chto patencyjna chacieŭ by hulać u hetyja hulni pa-biełarusku, razoŭ u 20 bolšaja.
«Napačatku my čakali, što budzie našmat mienš achvotnych karystacca tym, što my stvarajem. Ale, jak vyśvietliłasia, nia ŭsio tak kiepska ŭ našaj krainie, tamu što pierakłady sapraŭdy zapatrabavanyja», — ličyć Siaržuk Ušaŭ.
Pierakładnickaje tavarystva «ReZervacyJa» šukaje achvotnikaŭ paŭdzielničać u pierakładzie i lakalizacyi kamputarnych hulniaŭ na biełaruskuju movu.