Pra toje, što ŭ Vialikaj Svarotvie miascovyja haspadarniki robiać darohu praz staradaŭni park i źniščajuć drevy, ekołaham i žurnalistam paviedamili viaskoŭcy, piša Intex-press.

Sapraŭdy, siońnia centralnaja častka parka ŭ Vialikaj Svarotvie śpiareščana pratektarnymi śladami hihanckich kołaŭ, paŭsiudy nasypanyja kučy žoŭtaha piasku, lažać vydranyja drevy.

– Niezvarotna paškodžanaja častka parkavaj terasy: źniščana niekalki starych drevaŭ, zryta častka ściany bezu, mocnyja miechaničnyja paškodžańni atrymaŭ bydynak byłoj kuźni, da jakoj viaduć ślady traktara-pahruzčyka.

Toje, što za amal 200 hadoŭ nie razburyli ni vojny, ni čas – razburyŭ niejki miechanizatar, – prakamientavaŭ ŭbačanaje ŭ Vialikaj Svarotvie staršynia ekołaha-krajaznaŭčaha hramadskaha abjadnańnia «Nieruš» Uładzimir Zujeŭ.

Pa słovach ekołaha, park u Vialikaj Svarotvie admietny niekalkimi indykatarnymi vidami faŭny. Tut, naprykład, žyvie ŭstojlivaja papulacyja zvyčajnaj kvakšy – nievialikaja, ale miłavidnaja žabka, jakaja žyvie pieravažna na drevach i kustoŭi – zaniesiena ŭ Čyrvony śpis Mižnarodnaha sajuza achovy pryrody jak vid, što patrabuje ŭvahi. U parku adznačajecca šmat vinahradnych smaŭžoŭ, jakich u Biełarusi zdabyvajuć u pramysłovych maštabach, adnak heta zdabyča stroha limitavana.

Budaŭnictva darohi ŭ parku ŭ Vialikaj Svarotvie taksama moža parušyć spakoj stronhi – adnaho z najkaštoŭniejšych biełaruskich čyrvonaknižnikaŭ siamiejstva łasosievych, jaki žyvie i nierastuje ŭ miascovaj rečcy Svarotva. Daroha, jakuju ciapier robiać u Vialikaj Svarotvie, akurat viadzie da brodu praz rečku ŭ miežach parka.

Kiraŭnik filijała «Pačapaŭski» ptuškafabryki «Družba Ihar Hryb, čyje pali atačajuć Vialikuju Svarotvu, paćvierdziŭ u razmovie z Intex-press, što jaho haspadarniki sapraŭdy padsypajuć i pašyrajuć darohu praz park na miescy staroj, zarosłaj z časam viaskovaj darohi, kab sielskahaspadarčaja technika mieła dadatkovaje vyjście na pali pa inšy bok Svarotvy.

– U mianie na tym bierazie kala 500 ha paloŭ. Ja ž nie mahu ŭsiu techniku praź viosku puskać! – ahučyŭ svaju pazicyju Ihar Hryb.

I ŭsio ž dazvołu na praviadzieńnie darožna-budaŭničych rabot, pa jaho słovach, haspadarniki nie atrymlivali.

– Jaki dazvoł ad mianie patrabujecca, kali ja pravodžu sielskahaspadarčyja raboty! – vykazaŭ mierkavańnie Ihar Hryb.

Adnak, jak paviedamiŭ Intex-press načalnik Baranavickaj haradskoj i rajonnaj inśpiekcyi pryrodnych resursaŭ i achovy navakolla Aleh Zahurski, haspadarniki ŭsio ž musili atrymać dazvoł na budaŭnictva darohi i vykarčoŭvańnie drevaŭ, tym bolš, što budaŭnictva adbyvajecca ŭ 25-mietrovaj vodaachoŭnaj zonie rečki Svarotvy.

U najbližejšy čas supracoŭniki inśpiekcyi paabiacali vyjechać na miesca, kab razabracca ź situacyjaj.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?