U Biełarusi prapanoŭvajecca stvaryć adzinuju sistemu sudoŭ ahulnaj jurysdykcyi, u jakuju ŭvojduć ahulnyja i haspadarčyja sudy, a ŭznačalić hetu sistemu Viarchoŭny sud. Pra heta zajaviŭ Alaksandr Łukašenka 19 listapada na naradzie pa pytańni ŭdaskanalvańnia dziejnaści sudoŭ i orhanaŭ justycyi.
Łukašenka padkreśliŭ, što ŭžo prapracavanyja mahčymyja varyjanty ŭdaskanaleńnia sudovaj sistemy. Jon zaznačyŭ, što prapanoŭvajecca stvaryć mienavita adzinuju sistemu sudoŭ ahulnaj jurysdykcyi, pažadana, na pryncypova novaj asnovie. Razmova taksama idzie pra toje, kab pieradać stvaranaj sudovaj sistemie funkcyi pa arhanizacyjnym, materyjalna-techničnym i kadravym zabieśpiačeńni sudoŭ. Prapanoŭvajecca taksama ab`iadnać sudovych vykanaŭcaŭ u adzinuju słužbu ŭ miežach Ministerstva justycyi.
Pry hetym Łukašenka zajaviŭ, što refarmavańnie sudovaj sistemy nie pavinna paciahnuć pavieličeńnia kolkaści rabotnikaŭ abo dadatkovaha raschodavańnia biudžetnych srodkaŭ. Jon źviarnuŭ asablivuju ŭvahu na nieabchodnaść skaračeńnia ŭ sudovaj sistemie papieratvorčaści.
«My pavinny pryjści da značnaha skaračeńnia kolkaści absłuhoŭvajučaha piersanału. Sudździaŭ u nas i tak niašmat. Kali my źvierniemsia da papieratvorčaści, dzikaj papieratvorčaści, napeŭna, sudy pieršaje miesca buduć zajmać pa hetym pakazčyku. Sprościm roznaha kštałtu pracedury, hetu papieratvorčaść», — skazaŭ jon.
Jon zaznačyŭ, što ŭ Biełarusi ŭžo «pastupili rašuča pa niekatorych pytańniach udaskanaleńnia pravavoj sistemy naohuł». «Ja maju na ŭvazie rašeńnie pa vydzialeńni Śledčaha kamiteta ŭ samastojny orhan. I nichto, prynamsi, za hety čas, nie skazaŭ pra toje, što my zrabili niapravilna. Usie padtrymlivajuć heta rašeńnie, i da mianie idzie infarmacyja pra bolš efiektyŭnuju pracu pravaachoŭnaj sistemy ŭ cełym. Siońnia nam treba pasprabavać pryniać rašeńnie pa ŭdaskanaleńni sudovaj sistemy», — skazaŭ jon.
Łukašenka taksama zaznačyŭ, što apošnim časam ahulnyja i haspadarčyja sudy dystancavalisia adzin ad adnaho i heta jašče bolš abciažaryła praces sudovaj abarony i dostupu da pravasudździa dla hramadzian i arhanizacyj. Viadomyja vypadki, kali adna i taja ž pravavaja situacyja vyrašałasia ahulnymi i haspadarčymi sudami zusim pa-roznamu, što niedapuščalna. «Tamu siońnia nam treba pryniać aptymalnyja rašeńni pa aktualnych i važnych dla dziaržavy i hramadstva pytańniach udaskanaleńnia dziejnaści sudoŭ», — zajaviŭ Łukašenka.
