Były kiraŭnik MZS Słavakii Pavał Demieš źviarnuŭsia z adkrytym listom da Uładzimira Makieja. Jon byŭ napisany napiaredadni adkryćcia samitu «Uschodniaha partniorstva» ŭ Vilni.
Pryvodzim tekst lista, atrymanaha redakcyjaj sajta charter97.org, całkam:
«Pavažany ministr Makiej,
Pakolki vy, narešcie, vyrašyli ŭziać udzieł u samicie «Uschodniaha partniorstva ŭ Vilni, ja ŭpeŭnieny, što vy budziecie mieć mahčymaść pračytać hety list.
Jość try pryčyny, čamu ja vyrašyŭ napisać vam.
Ja ŭpeŭnieny, što ni adzin z 500 miljonaŭ hramadzian JEZ nie dašle vam svaje pryvitańni. Vy z usich sił staralisia prysutničać na hetym samicie jeŭrapiejskich lidaraŭ, da ŭdziełu ŭ jakim, uličvajučy žorstkaść u adnosinach da ŭłasnych hramadzian, nie byŭ zaprošany vaš haspadar, spadar Łukašenka. Ja raniej zrabiŭ niapravilnuju vysnovu ab tym, što vy adpravicie svajho namieśnika, jaki nikoli nie znachodziŭsia ŭ «čornym śpisie», u adroźnieńnie ad vas.
Mnie padabajecca vaša kraina, i ja zachopleny mnohimi śmiełymi patryjotami, jakija zmahajucca za toje, kab Biełaruś stała cyvilizavanaj jeŭrapiejskaj dziaržavaj. Ja pierakanany, što paśla taho, jak samaizalacyja, učynienaja vašym uradam, skončycca, jeŭrapiejcy adkryjuć dla siabie dziŭnuju krainu c sardečnymi, kulturnymi, časam saramlivymi i zaŭsiody vielmi pracavitymi žycharami.
Ja nie mahu mieć znosiny z vami ŭ zvyčajnym paradku, choć ja źjaŭlajusia byłym ministram zamiežnych spraŭ Słavakii i, takim čynam, svajho rodu, vašym kaleham. Paśla taho, jak ja byŭ mižnarodnym naziralnikam na prezidenckich vybarach u 2010 hodzie, vyniki jakich ułady vašaj krainy vyrašyli źniščyć, mianie zrabili piersonaj non-hrata ŭ Biełarusi. Vašym dypłamatam składana sustrecca sa mnoj.
Ja nie ŭpeŭnieny, što zaniatyja arhanizatary samitu ŭ Litvie znojduć čas dla padrychtoŭki hruntoŭnaj prahramy dla vašaha redkaha vizitu. Tym nie mienš, u vas jość unikalnaja mahčymaść zrabić pa-jeŭrapiejsku.
Vilnia źjaŭlajecca časovym domam dla Jeŭrapiejskaha humanitarnaha ŭniviersiteta, dzie atrymlivajuć adukacyju šmat talenavitych biełaruskich studentaŭ. Vy, viadoma, viedajecie jaho rektara, prafiesara Anatola Michajłava, jaki moh by ŭ karotkija terminy arhanizavać dla vas lekcyju, rastłumačyć i abmierkavać pytańni adnosinaŭ pamiž Biełaruśsiu i ES. Inšy biełaruski instytut, Dom pravoŭ čałavieka imia Barysa Zvozskava, taksama budzie hatovy napiaredadni Kaladaŭ pravieści z vami dyskusiju z nahody takich nieadkładnych spraŭ, jak los palityčnych źniavolenych u vašaj krainie.
I ja ŭpeŭnieny, što mnohija biełaruskija demakraty, jakija byli vymušanyja emihravać z krainy, takija jak aktyvisty hramadzianskaj kampanii «Jeŭrapiejskaja Biełaruś», jakija ciapier dziejničajuć z Varšavy, pryjduć sustrecca z vami i pahavaryć pra Jeŭropu, kali vy vyjavicie cikavaść.
Ja spadziajusia, što vy, prynamsi, zacikaviciesia niekatorymi z hetych prapanoŭ. Pry nieabchodnaści, ja ŭ vašym rasparadžeńni dla taho, kab znajści naležny sposab znosinaŭ ź jeŭrapiejskaj demakratyčnaj siamjoj.
Šmat kamu u Jeŭropie i ŭ rešcie śvietu chaciełasia b vieryć u sapraŭdnuju adkrytaść biełaruskaha ŭrada, ale jany pa-raniejšamu nastrojenyja skieptyčna. Kali łaska, dakažycie, što my nie majem racyi.
Z pavahaj, Pavał Demieš».
