Fota svaboda.org

Fota svaboda.org

Pravaabaroncy-viasnoŭcy i Biełaruski Chelsynski kamitet patrabujuć nieadkładna vyzvalić hramadzkaha aktyvista Vasila Parfiankova i spynić jaho kryminalny pieraśled.

Pravaabaroncy zajavili, što asudžeńnie Parfiankova da pazbaŭleńnia voli źjaŭlajecca palityčna matyvavanym pieraśledam, paviedamlaje radyjo «Svaboda».

6 śniežnia Pieršamajski sud Miensku paŭtorna asudziŭ Parfiankova na adzin hod pazbaŭleńnia voli ŭ kalonii strohaha režymu za parušeńnie preventyŭnaha nahladu.

Pravaabaroncy ličać, što hety prysud nakiravany na toje, kab pieraškodzić hramadzka-palityčnaj aktyŭnaści Vasila Parfiankova.

«Raźbiralnictva pa hetaj spravie nie adpaviadała standartam spraviadlivaha sudovaha raźbiralnictva, a vyniesienaje pakarańnie źjaŭlajecca vidavočna nie suvymiernym i nie praparcyjnym tym parušeńniam, u jakich abvinavačvali Parfiankova», — adznačajecca ŭ raspaŭsiudžanaj zajavie.

Taksama pravaabaroncy adznačajuć, što roznaha kštałtu abmiežavańni — ad prafilaktyčnaha ŭliku da preventyŭnaha nahladu — ustanoŭlenyja adnosna 32 čałaviek, asudžanych za Płošču 19 śniežnia 2010 hodu.

Jany byli vyzvalenyja z turmaŭ biez pahašeńnia sudzimaści. Preventyŭny nahlad ustanoŭleny taksama adnosna niadaŭna vyzvalenych palitviaźniaŭ Źmitra DaškievičaAlaksandra Franckieviča.

«Hetyja abmiežavańni źjaŭlajucca elementam kantrolu ŭładaŭ nad hramadzkimi i palityčnymi aktyvistami. Kryminalny pieraśled za parušeńni raniej ustanoŭlenaha preventyŭnaha nahladu ŭ dačynieńni Vasila Parfiankova, Uładzia Jaromienka, ustanoŭleny preventyŭny nahlad u dačynieńni da Paŭła Vinahradava źjaŭlajucca jaskravym prykładam takoha kantrolu», — adznačajecca ŭ zajavie.

Pravaabaroncy zaklikajuć spynić praktyku kryminalnaha pieraśledu palityčnych i hramadzkich aktyvistaŭ i źniać sudzimaści z raniej vyzvalenych palitźniavolenych.

U lutym 2011 hodu Vasila Parfiankova asudzili da čatyroch hadoŭ turmy za ŭdzieł u akcyi pratestu suprać falsyfikacyi prezydenckich vybaraŭ, a ŭ žniŭni taho ž hodu jaho pamiłavali zhodna z prezydenckim ukazam.

Paśla vyzvaleńnia Parfiankoŭ praciahvaŭ hramadzkuju dziejnaść, jaho nieadnarazova zatrymlivali za ŭdzieł u akcyjach padtrymki biełaruskich palitviaźniaŭ.

U 2011 hodzie paśla ŭdziełu ŭ mirnym schodzie salidarnaści z palitviaźniami aktyvista aryštavali na 12 sutak.

5 studzienia 2012 hodu sud Pieršamajskaha rajonu Miensku ŭstanaviŭ preventyŭny nahlad za Parfiankovym na adzin hod.

Pavodle pravaabaroncaŭ, heta było zroblena, kab praduchilić jaho hramadzkuju dziejnaść i ŭdzieł u mirnych schodach. Letaś 29 traŭnia Vasila aryštavali na 6 miesiacaŭ za parušeńnie ŭmovaŭ prafilaktyčnaha nahladu, ustanoŭlenaha sudom. Pravaabaroncy pryznali hety prysud palityčna matyvavanym, a Parfiankova palitviaźniem.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?