Pamočnik Alaksandra Łukašenki, doktar ekanamičnych navuk Kirył Rudy vystupiŭ na staronkach «SB. Biełaruś siehodnia» z prahramnym artykułam «Biełaruś-2030: apieradžalnaje raźvićcio».
«Jakaja meta ŭ Biełarusi u 2030 hodzie?» – zadajecca pytańniem Rudy. Jon miarkuje, što hnacca za pryrostam VUP i pradukcyjnaściu pracy niepierśpiektyŭna.
«Va ŭmovach adkrytych miežaŭ, hłabalnaj ekanomiki dla krainy ŭžo mała zaŭtra stać lepšaj, čym učora, važniej stać lepšaj za inšych. U suviazi z hetym metaj stratehii moža stać apieradžalnaje raźvićcio.
Ale kaho dahaniać, apiaredžvać i z kim paraŭnoŭvacca? Heta mahli b być bližejšyja krainy, jakija znachodziacca ŭ padobnych hieahrafičnych umovach: Ukraina, Polšča, krainy Bałtyi, rehijony Rasii, jakija miažujuć ź Biełaruśsiu, ci inšyja supastaŭnyja krainy (Vienhryja, Słavakija, Čechija i inšyja)», - adznačaje jon.
Jakija haliny zabiaśpiečać dasiahnieńnie pastaŭlenaj mety i stanuć pryjarytetnymi? Na pramysłovaść i sielskuju haspadarku Rudy nie raźličvaje: addača ad inviestycyj u hetyja śfiery padaje.
Pamočnik Łukašenki prapanuje čatyry inšyja nakirunki raźvićcia.
Na jaho dumku, na śfieru pasłuh (budaŭnictva, transpart, handal) vonkavyja šoki ŭpłyvajuć nie tak mocna, što stvaraje stabilnaść ekanamičnaha rostu ŭ Biełarusi. Raźličvaje Rudy i na enierhietyku, u tym liku jadziernuju. «Vakoł budaŭnictva i pracy AES moža sfarmavacca navukova-vytvorčy kłastar, źjavicca novaje kankurentnaja pieravaha ŭ vyhladzie novych enierhajomistych vytvorčaściaŭ».
Treciaje i čacviortaje: pieradavyja vysokatechnałahičnyja haliny i infarmacyjnyja technałohii. «Metazhodna maksimalna vykarystoŭvać tradycyjna mocny nacyjanalny patencyjał u hetaj śfiery. Mahčyma, varta padumać nad novaj rolaj Parku vysokich technałohij jak centra raźvićcia elektronnaj ekanomiki z udziełam BDUIR, BDU, NAN. Miarkuju, što akazvajemaja dziaržpadtrymka Parku vysokich technałohij pavinna davać adpaviednuju addaču krainie ŭ navukovaj (u vyhladzie suśvietnych patentaŭ) i sacyjalna-ekanamičnaj (rost ŭzroŭniu žyćcia i papaŭnieńni biudžetu) śfierach», – razvažaje Kirył Rudy.
