Prahramisty ź Biełarusi nie ŭdzielničali ŭ stvareńni kampjutarnaj sistemy reformy achovy zdaroŭja ZŠA, paviedamlaje Reuters sa spasyłkaj na pradstaŭnika Nacyjanalnaha savieta pa biaśpiecy ZŠA Kejtlin Chejden.
Infarmacyja ab tym, što biełaruskija prahramisty ŭdzielničali ŭ raspracoŭcy prajekta HealthCare.gov, źjaviłasia 3 lutaha na sajcie freebeacon.com. Pavodle źviestak partała, słužby raźviedki ZŠA paviedamili ab hetym u administracyju prezidenta Baraka Abamy na minułym tydni i paprasili pravieryć sistemu na najaŭnaść škodnych prahram.
Uvahu śpiecsłužbaŭ pryciahnuła intervju kiraŭnika Parka vysokich technałohij Valeryja Capkały, jakoje vyjšła ŭ efir radyjo «Hołas Rasii» jašče 25 červienia 2013 hoda. Tady Capkała zajaviŭ: «Adzin z našych klijentaŭ — Ministerstva achovy zdaroŭja Złučanych Štataŭ, nam płaciać za dapamohu Abamie z reformaj achovy zdaroŭja».
Aściarohi raźviedki vyklikała mahčymaja ŭraźlivaść sistemy dla kibieratak u vypadku ŭdziełu ŭ jaje raspracoŭcy prahramistaŭ, źviazanych z uładami Biełarusi.
4 lutaha Kejtlin Chejden paćvierdziła, što amierykanskija śpiecsłužby niadaŭna vypuścili, a zatym adklikali spravazdaču, źviazanuju z mahčymym udziełam biełaruskaj kampanii ŭ raspracoŭcy prahramnaha zabieśpiačeńnia.
Pavodle słoŭ Chejden, śpiecyjalisty Ministerstva achovy zdaroŭja i sacyjalnych słužbaŭ ZŠA «nie znajšli prykmiet taho, što niejkija prahramy byli stvorany ŭ Biełarusi».
Kampanija CGI Federal, hałoŭny padradčyk dla prajekta HealthCare.gov, u svaju čarhu apublikavała ŭ suviazi z hetym nastupnuju zajavu: «Padčas svajoj raboty nad HealthCare.gov CGI nikoli nie pryciahvała u jakaści subpadradčyka pradpryjemstvy abo śpiecyjalistaŭ ź Biełarusi, i ź minskaha Parka vysokich technałohij u pryvatnaści. Usia rabota dla HealthCare.gov CGI vykanana ŭ Złučanych Štatach».
Pavodle źviestak Lenta.ru, sajt HealthSare.gov, pryznačany dla pošuku i kupli miedycynskaj strachoŭki, byŭ zapuščany 1 kastryčnika 2013 hoda ŭ miežach reformy achovy zdaroŭja, jakuju pravodzić administracyja Baraka Abamy. Na raspracoŭku partała spatrebiłasia try hady i pryblizna 292 miljony dołaraŭ.
