Pomnik kampazitaru Stanisłavu Maniušku budzie ŭstanoŭleny na płoščy Svabody ŭ Minsku. Ab hetym havorycca ŭ adkazie Minharvykankama na zvarot minčan z prośbaj ab ustanoŭcy pomnika.
U lipieni minułaha hoda pa inicyjatyvie Alesia Biełaha i Dzianisa Sałaša na internet-płatformie www.change.org pačaŭsia zbor podpisaŭ pad zvarotam da staršyni Minharvykankama Mikałaja Ładućki z prośbaj ustanavić pomnik Maniušku.
Inicyjatary adznačali, što dla biełaruskaj kultury asablivaje značeńnie maje supracoŭnictva Stanisłava Maniuški ź Vincentam Duninym-Marcinkievičam, vynikam jakoha stali čatyry kamičnyja opiery, uklučajučy słavutuju «Idyliju». Na dumku aŭtaraŭ pietycyi, 200-hodździe Maniuški, jakoje budzie adznačacca ŭ 2019 hodzie, pavinna supravadžacca šeraham jubilejnych mierapryjemstvaŭ, «u tym liku ŭstanoŭkaj dastojnaha pomnika, najlepšym miescam dla jakoha, na dumku bolšaści ekśpiertaŭ, źjaŭlajecca skvier na płoščy Svabody ŭ Minsku, tvaram da haścinicy «Jeŭropa». U siaredzinie XIX stahodździa na miescy hatela znachodziŭsia Minski haradski teatr, dzie i adbyłasia premjera «Idylii».
U śniežni minułaha hoda pietycyja sabrała 4.200 podpisaŭ, jakija razam z 120 realnymi podpisami byli pieradadzieny ŭ Minharvykankam.
U adkazie za podpisam načalnika hałoŭnaha ŭpraŭleńnia ideałahičnaj raboty, kultury i pa spravach moładzi harvykankama Siarhieja Chilmana paviedamlajecca, što Minharvykankam «pryncypova padtrymlivaje hetuju prapanovu». Prajekt rekanstrukcyi i restaŭracyi zabudovy histaryčnaha centra Minska praduhledžvaje ŭstanoŭku pomnika Maniušku na płoščy Svabody, paviedamlaje aŭtar lista.
Paviedamlajecca taksama, što Minski haradski mastacka-ekśpiertny saviet pa manumientalnym i manumientalna-dekaratyŭnym mastactvie ŭchvaliŭ madel pomnika «S.Maniuška i V.Dunin-Marcinkievič», prapanavanuju skulptaram Siarhiejem Humileŭskim. Rabota pa stvareńni pomnika ažyćciaŭlajecca KUP «Minskaja spadčyna» ŭ adpaviednaści z pastanovaj Savieta ministraŭ ad 19 vieraśnia 2008 hoda № 1372 «Ab niekatorych pytańniach stvareńnia (rekanstrukcyi) i pryjomki tvora manumientalnaha i manumientalna-dekaratyŭnaha mastactva».
«Jak i maryła hramadskaść, pomnik ustanoviać u samym pryhožym miescy biełaruskaj stalicy — na płoščy Svabody, kala haradskoj ratušy. I taki vybar nie vypadkovy, bo mienavita z hetym miescam najbolš ciesna źviazana bijahrafija Maniuški», — prakamientavŭ rašeńnie minskich uład Dzianis Sałaš.
