Rasija moža ŭvieści peŭnyja miery adnosna biełaruskaj małočnaj pradukcyi dla achovy rynku ad niadobrasumlennaj kankurencyi, zajaviŭ vice-premjer RF Arkadź Dvarkovič na źjeździe Nacyjanalnaha sajuza vytvorcaŭ małaka siońnia ŭ Maskvie.
fota gazeta.ru
«Što da kankretnych mier adnosna niadobrasumlennaj kankurencyi na rynkach. Zhadvałasia Biełaruś — pavodle našych acenak, tut jość niadobrasumlennaja kankurencyja, i naš rynak ad hetaha cierpić. Chutčej za ŭsio, nam daviadziecca prymać peŭnyja miery ŭ adkaz u dačynieńni da partnioraŭ ź Biełarusi», — cytuje Dvarkoviča ahienctva Prajm.
Pry hetym vice-premjer adznačyŭ: miery buduć nakiravanyja abo naŭprost na małočnuju pradukcyju, abo pa inšych kirunkach supracoŭnictva.
U vieraśni 2013 hoda Rasspažyŭnahlad zajaviŭ ab najaŭnaści pretenzij da jakaści biełaruskaj małočnaj pradukcyi. Viedamstva paviedamlała, što tolki ŭ Maskoŭskaj vobłaści z 240 uzoraŭ biełaruskaj pradukcyi, pravieranaj za apošni čas, 30% nie adpaviadali patrabavańniam jakaści i biaśpieki.
Ab svaich pretenzijach da jakaści małočnaj pradukcyi ŭ ramkach Mytnaha sajuza ŭ kancy śniežnia minułaha hoda zajaŭlaŭ i Raśsielhasnahlad.
Paviedamlałasia, u pryvatnaści, što ŭ małočnaj pradukcyi na terytoryi MS byli vyjaŭleny antybijotyki ŭ kolkaści, jakaja šmatrazova pieravyšaje dapuščalnuju normu. U suviazi z hetym Raśsielhasnahlad zajaviŭ ab namiery ŭzmacnić u 2014 hodzie kantrol za jakaściu małočnaj pradukcyi ŭ Mytnym sajuzie.
14 studzienia pieršy namieśnik ministra sielskaj haspadarki i charčavańnia Biełarusi Leanid Marynič zajaviŭ, što Biełaruś pavinna ŭzmacniać svaju prysutnaść na rasijskim rynku. «My siońnia viedajem, što deficyt u Rasii składaje amal 8-9 miljonaŭ ton. Nie budziem pastaŭlać my — pastaviać inšyja, ale kali my členy Mytnaha sajuza, my ŭ adnoj źviazcy, značyć, my majem pryjarytetnaje prava», — skazaŭ Marynič.
