Za samavolnaje raźmiaščeńnie sacyjalnaj rekłamy na čužym ščycie ŭ centry Minska kuratar sajtu mnenije.by Jahor Darafiejeŭ, chutčej za ŭsio, zapłacić štraf. Na parušeńnie zakona Darafiejeŭ pajšoŭ śviadoma — pa-pieršaje, kab aktualizavać prablemu pjanstva za styrnom, pa-druhoje, kab pakazać, jakoj moža być sacyjalnaja rekłama.
4 lutaha Jahor Darafiejeŭ razam z pamočnikami raźmiaściŭ na bordzie na skryžavańni staličnych vulic Jakuba Kołasa i Surhanava raściažku z zaklikam nie siadać pjanym za styrno.
Pavodle jaho słoŭ, ideja hetaha biłborda naśpiavała daŭno, a na ŭstalavańnie spatrebiłasia ŭsiaho 20 chvilin. Za hety karotki čas pad niezvyčajnaj rekłamaj stali źbiracca ludzi, chtości fatahrafavaŭ, chtości łajaŭsia, ale ŭ asnoŭnym ludziam padabałasia. Darabiŭšy svaju pracu, chłopcy źjechali. Usiu noč biłbord mirna prastajaŭ na zimovaj vulicy.
«Na čužym ščycie, na čužoj rekłamie…»
… Naranicu supracoŭniki Minharvykankama vyjavili fatahrafii «ź miesca padziei» u internecie. Nielehalnaja vyjava ź biłborda była źniataja, a suprać asob, jakija ŭpieršyniu ŭ historyi Minska pakvapilisia na čužuju rekłamnuju płošču, za parušeńnie zakona ab rekłamie ŭžo zaviedzienaja sprava ab administracyjnym pravaparušeńni.
Pa słovach Darafiejeva, štraf składzie ad 5 da 30 bazavych vieličyń, bo abvinavačańni pradjaŭlajucca fizičnaj, a nie jurydyčnaj asobie. U apošnim vypadku štraf moh by dasiahnuć 6,5 młn. rubloŭ.
«Hetaja rekłama nienaležnaja, nieetyčnaja, zakonam niaŭzhodnienaja! - raspaviadaje načalnik adździeła pa kantroli za rekłamaj i abaronie pravoŭ spažyŭcoŭ upraŭleńnia handlu i pasłuh Minharvykankama Iryna Latniak. - Na čužym ščycie, na čužoj rekłamie byŭ raźmieščany płakat. Tut Jahor Darafiejeŭ pieraśledvaŭ svaje kankretnyja mety!»
Na dumku Iryny Latniak, da sacyjalnaj rekłamy vyviešany Darafiejevym płakat «nijakaha dačynieńnia nie maje», chutčej - heta chulihanstva.
A voś tuju sacyjalnuju rekłamu, jakuju my kožny dzień razhladajem na minskich vulicach, Iryna Latniak ličyć «dobraj i dziejsnaj».
Tych, kaho praviły ŭzhadnieńnia hetaj rekłamy nie zadavalniajuć, pradstaŭnik Minharvykankama adpraŭlaje ŭ Mižviedamasny saviet pa rekłamie, jaki byŭ stvorany pry Ministerstvie handlu ŭ lipieni 2013: «U hetym saviecie pracujuć jak rekłamščyki, tak i mnohija inšyja śpiecyjalisty, u tym liku, psichołahi. Kali chtości nie zhodny ź mierkavańniem «niekampietentnaha» čynoŭnika ci jašče kaho-niebudź, jon moža źviarnucca tudy i atrymać ekśpiertny punkt hledžańnia».
«Na našym biłbordzie niama nivodnaha niecenzurnaha słova!»
Pa słovach Darafiejeva, svajoj viny ŭ hetaj avantury jon i jaho kalehi nie admaŭlajuć.
«Raźmiaščajučy hety biłbord, my vyrašyli zakranuć sacyjalnuju temu pazbaŭleńnia pravoŭ pjanych kiroŭcaŭ, zabiŭšy takim čynam dvuch zajcoŭ», — zaŭvažyŭ Darafiejeŭ, padkreśliŭšy aktualnaść prablemy.
«Na našym biłbordzie niama nivodnaha niecenzurnaha słova! — Upeŭniena zajaŭlaje Jahor Darafiejeŭ. - Jość słova «piz*iuk, napisanaje z «zoračkaj». Havoračy pra tataŭ i mamaŭ, jakija aburylisia, maŭlaŭ, jaki žach, što ž budzie, kali dzieci pračytajuć, tłumaču: usio zaležyć ad vychavańnia. Majmu dziciaci 12 hadoŭ — jon takoha niecenzurnaha słova, pra jakoje ŭsie padumali, prosta nie viedaje. Kali dzicia znajomaje z hetym słovam, to tut sapraŭdy nie rekłama vinavataja».
Svaim učynkam Darafiejeŭ taksama chacieŭ by pryciahnuć hramadskuju ŭvahu da składanaściaŭ, jakija supravadžajuć praces uzhadnieńnia vuličnaj rekłamy: «Siońnia
ŭ Minsku možna ŭbačyć šmat sacyjalnaj rekłamy. Chaču zaŭvažyć, usia jana absalutna biazdarnaja, u tym liku i z-za taho, što ŭ Minhandli nie ŭzhadniajuć inšuju, bolš kreatyŭnuju.
Adnojčy ja mieŭ znosiny z supracoŭnikam Minhandlu — heta čałaviek, jaki całkam adstaŭ ad žyćcia. Ujaŭlajecie, kamuści pryjšła ŭ hałavu dobraja ideja, jon chodzić ź joju, vynošvaje, prychodzić ŭzhadniać, a jamu — «oj, mnie nie padabajecca», tamu što «jana niejkaja niapravilnaja».
Niahledziačy na štraf, jaki «chulihanam» usio ž taki pryjdziecca zapłacić, uładalnik sajta mnenije.by zachoŭvaje pazityŭny nastroj i ŭžo buduje płany na budučyniu: «Naš učynak vyklikaŭ šmat roznych vodhukaŭ: jość admoŭnyja, jość stanoŭčyja, ale niama abyjakavych, što vielmi važna. Viadoma, my pierahnuli pałku, ale heta treba było zrabić, kab pakazać: byvaje inakš, a nie tak uboha, da čaho my pryvykli».
Jahor Darafiejeŭ upeŭnieny, što ŭ budučyni dziakujučy jamu i jaho kaleham u stalicy źjaviacca i inšyja cikavyja biłbordy. Pa słovach Darafiejeva, jaho idejami ŭžo cikaviacca.
