Manifiest anarcha-sindykata Lyapis Crew u padtrymku alboma «Matroška», jaki rychtujecca da vychadu, apublikavaŭ 5 lutaha na svaim aficyjnym sajcie biełaruski rok-hurt «Lapis Trubiacki».

Matroška była stvorana ŭ XIX stahodździ jak simvał maciarynstva i ŭradlivaści, nahadali aŭtary adozvy, adnak siońnia, «jak i mnohija inšyja samabytnyja ruskija simvały», jana pieratvaryłasia «ŭ kič i łubok».

«Siońniašniaja matroška — heta zborny vobraz «ruskaha» časoŭ chałodnaj vajny, — miarkujuć muzykanty. — Miadźviedziepadobnaja, pjanaja i ahresiŭnaja istotna, jakaja pahražaje śvietu chruščoŭskim tuflem i rakietami, aśviačonymi patryjarchalnymi bahaborcami.

Arbackija śpiekulanty źlapili matrošku-piarevaratnia ź biustaŭ Stalina i Lenina, paviazali na jaje pijanierski halštuk i nadzieli budzionaŭku. I hetaja pačvara ź impierskimi ambicyjami znoŭ pahražaje niabačnamu vorahu, pałochaje dziaciej piataj kałonaj, CRU i «fašystvujučymi homasieksualistami» Jeŭrasajuza. A kab čałaviek nie žyŭ siońniašnim, jamu ŭ hałavu ŭbivajuć słavutuju Nacyjanalnuju Ideju!»

Artysty ŭ svaim manifieście kažuć, što «prostyja biełarusy, ukraincy, kazachi i inšyja» chočuć «žyć svaim rozumam», «siabravać sa svaimi susiedziami, a nie tolki z bratami pa zbroi ź lubych vajennych błokaŭ», a taksama raźvivać svaju movu, mastactva i kulturu. Ad imia hetych narodaŭ jany padkreślili, što «lubiać i pavažajuć Rasiju», ale nie chočuć, kab imi kiravali «kramloŭskija technołahi».

Pakul narodami «kirujuć bandyty, hebisty i samadzieržcy», prostyja ludzi «buduć žyć biedna, zabita» i vinavacić va ŭsich biedach jaŭrejaŭ, nietradycyjnyja sieksualnyja mienšaści, «marsijan, Amieryku, aliharchaŭ, vachabitaŭ», słovam, «usich, aprača samich siabie, svajoj ułady i pravicielaŭ».

«Niachaj matroška znoŭ raduje svajoj uśmieškaj ludziej na ŭsioj płaniecie! Patušym ahoń novaj chałodnaj vajny ŭ zarodku, pakul nie stała zanadta pozna», — zaklikali muzykanty «Lapisa Trubiackoha».

U novy albom «Matroška» ŭvojduć adzinaccać ruskamoŭnych kampazicyj, u liku jakich adnajmiennaja pieśnia, a taksama sinhły «Tank» i «Tancuj», jakija vyjšli raniej. Reliz alboma zapłanavany na 1 sakavika, u hety ž dzień kancertam u Varoniežy (Rasija) hurt pačnie hastrolny tur u padtrymku «Matroški». Padčas tura muzykanty daduć kancerty ŭ 16 haradach Rasii, vaśmi haradach Ukrainy, a taksama ŭ Prazie. Kancerty ŭ Biełarusi ci Litvie artysty davać nie płanujuć.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?