Pahadnieńni ab spraščeńni vizavaha režymu i readmisii pamiž Jeŭrasajuzam i Biełaruśsiu mohuć być padrychtavany da kanca hetaha hoda. Takoje mierkavańnie vykazała ŭ intervju BiełaPAN kiraŭnik pradstaŭnictva ES u Biełarusi Majra Mora.

«Pieramovy tolki pačalisia. Była pieršaja sustreča ŭ Bruseli, kudy jeździła namieśnik kiraŭnika biełaruskaha MZS Alena Kupčyna. Nakolki mnie viadoma, nastupnaja sustreča płanujecca na sakavik, - skazała Mora. - Treba razumieć, što heta davoli praciahły praces. Ale i z boku ES, i ź biełaruskaha boku jość žadańnie pryjści da vyniku. Ja nastrojenaja aptymistyčna».

Pry hetym Mora adznačyła, što na chutkaść pracesu padrychtoŭki pahadnieńniaŭ da padpisańnia paŭpłyvaje jašče i nieabchodnaść ŭzhadnieńnia dakumientaŭ ŭnutry ES. «Prablema ŭ tym, što ŭ nas 28 krain-členaŭ i nieabchodna pravieści 28 uzhadnieńniaŭ hetych dakumientaŭ, - skazała kiraŭnik pradstaŭnictva. - Ź inšaha boku, praces padrychtoŭki palehčany tym, što ŭ ES užo jość vopyt zaklučeńnia takich pahadnieńniaŭ ź inšymi krainami. U nas jość asnova takich dahavoraŭ, ad jakich abodva baki adšturchvajucca».

Mora taksama adznačyła, što

paśla zaklučeńnia vizavaha pahadnieńnia dla biełarusaŭ budzie źnižany košt šenhienskich viz.

Pavodle jaje słoŭ, biełarusam vydajecca adno z najbolšych kolkaściaŭ šenhienskich viz u śviecie pry vielmi małym liku admoŭ. «I majo asabistaje mierkavańnie, što varta vydavać bolej doŭhaterminovych vizaŭ tym, chto časta vandruje, što značna pamienšyła b čerhi ŭ ambasady, bo jany radziej źviartalisia b pa vizy», - skazała Mora.

Rada ministraŭ ES jašče ŭ červieni 2011 hoda zaprasiŭ Biełaruś da pačatku pieramovaŭ ab spraščeńni vizavaha režymu. Rada ES nieadnarazova zaklikała biełaruskija ŭłady pačać pieramovy. U listapadzie 2013 na samicie Uschodniaha partniorstva ŭ Vilni ministr zamiežnych spraŭ Biełarusi Uładzimir Makiej zajaviŭ, što Biełaruś hatovaja pačać pieramovy pa pahadnieńniach ab spraščeńni vizavaha režymu i readmisii.

Pahadnieńnia ab spraščeńni vizavaha režymu ź ES užo padpisanyja z usimi krainami Uschodniaha partniorstva i Rasijaj.

Na dadzieny momant Biełaruś — adzinaja kraina UP, hramadzianie jakoj vymušanyja płacić za šenhienskuju vizu nie 35, a 60 jeŭra.

Jak paviedamlałasia raniej, dla taho kab spačatku spraścić, a potym i admianić vizavy režym ź ES, lubaja kraina pavinna prajści niekalki krokaŭ. Pieršy krok na šlachu da admieny vizaŭ ŭklučaje padpisańnie damovy ab vizavaj fasilitacyi i readmisii. Pahadnieńnie dazvolić pamienšyć košt vizaŭ, a dla niekatorych katehoryj hramadzian zrabić ich biaspłatnymi. Na druhim etapie pačynajecca dyjałoh ab vizavaj libieralizacyi ź ES, abmiarkoŭvajecca śpis reformaŭ, jakija kraina pavinna vykanać dla admieny vizavaha režymu. Kali kraina vykonvaje ŭsie patrabavańni płana i dakazvaje, što jaho pałažeńni realizujucca na praktycy, ES prymaje rašeńnie ab vizavaj libieralizacyi z hetaj krainaj, heta značyć ab admienie karotkaterminovych viz.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?