U Biełarusi budzie stvorana elektronnaja «Čornaja kniha stalinizmu. Biełaruś: złačynstvy, teror, represii», paviedamiŭ 12 lutaha na pres-kanfierencyi ŭ Minsku kiraŭnik biełaruskaha adździaleńnia mižnarodnaha historyka-aśvietnickaha, dabračynnaha i pravaabarončaha tavarystva «Miemaryjał» historyk Ihar Kuźniacoŭ.

«Pakolki kniha stvarajecca ŭ elektronnym vyhladzie, — adznačyŭ jon, — nijakich abmiežavańniaŭ pa abjomie materyjałaŭ nie praduhledžvajecca. Kožny moža padać materyjały, fota, kopii dakumientaŭ ab svaich svajakach, jakija paciarpieli ad represij, — biez usiakaj cenzury i abmiežavańniaŭ».

Pa słovach Kuźniacova, kniha budzie składacca z dvuch častak. Pieršaja budzie achoplivać pieryjad z 1929 -ha pa 1953 hod i ŭ dalejšym budzie papaŭniacca materyjałami z 1917-ha pa 1928, paślavajennymi padziejami i «tym, što charakterna dla sučasnaj Biełarusi, - historyja represij u nas, na žal, nie skončyłasia».

Jak skazaŭ kiraŭnik biełaruskaha «Miemaryjału», knizie buduć papiaredničać try pradmovy - francuzskaha historyka Nikala Vierta i Alaksandra Hrycanava, jaki pajšoŭ z žyćcia, viadomaha svaimi daśledavańniami pryrody tatalitaryzmu i aŭtarytaryzmu. Aŭtar treciaj pradmovy pakul nie vyznačany. Siarod aŭtaraŭ knihi Kuźniacoŭ nazvaŭ Taćcianu Proćku, Alaksandra Urubleŭskaha, Radzima Hareckaha, Irynu Ramanavu, Ninu Stužynskuju, Leanida Marakova, Leaniła Łyča i inšych, u tym liku pradstaŭnikoŭ zamiežnych krain.

«Prajekt vyklučna hramadski, nijakija hranty, pryciahnutyja finansy vykarystoŭvacca nie buduć», - zajaviŭ Kuźniacoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0