Źviestki pra «palicajskaje» minułaje Fiodara Janukoviča źjaviłasia ŭ virtualnaj prastory ŭ časie apošniaha palityčnaha kryzisu va Ukrainie. Ci byŭ baćka prezidenta Ukrainy palicajem, «Belsat.eu» vyśviatlaŭ u vioskach, zhadanych u niadaŭna apublikavanych dakumientach.
Papiery vajennych časoŭ narabili šumu ŭ internecie jašče hod tamu. U čas sioletnich padziejaŭ va Ukrainie dakumienty ŭzhadali jašče raz. Adzin ź ich padaje śpis dezierciraŭ vajny, jakija padlahali etapavańniu ŭ rasparadžeńnie NKVD. Infarmacyja pra «zdrajcu № 5» całkam supadaje z aficyjnaju bijahrafijaj baćki Viktara Janukoviča – narodžany ŭ vioscy Januki Viciebskaj vobłaści. Druhaja papiera – zahad viermachtu ab pabory małaka z žycharoŭ vioski Macki. Nibyta kantralavać praces abaviazali načalnika palicyi Radaškovickaha rajona Janukoviča.
frahmient dakumienta
frahmient dakumienta
My pajechali śladami Janukoviča, a dakładniej, śladami papieraŭ. Januki schavalisia miž Dokšycami dy Miadziełam.
170 km ad Miensku, dapamoha GPS-navihatara – i my ŭ histaryčnym miescy. Žyłaja vioska – heta dźvie chaty i dźvie siamji. Piatro i Akvilina Janukovičy – brat i siastra, 73 i 80 hadoŭ. Jany nie rodnyja prezidenta, prosta ŭ Janukach raniej kožny druhi mieŭ takoje proźvišča. Mohiłki paćviardžajuć heta – staryja pomniki praz adzin z nadpisam «Janukovič» ci «Janukowicz». Najstarejšy – z dataju naradžeńnia 1843 hod, jość i całkam užo zaciortyja. «Janukovičy raźlacielisia pa śviecie», – havoryć spadarynia Akvilina.
«A jaki ž jon naš?!»
Akvilina Lavonaŭna ŭžo pryzvyčajenaja da žurnalistaŭ i zdymak. «A jaki ž jon naš?! — vojkaje jana paśla słovaŭ pra Viktara Janukoviča. — Ja ž jaho viedaju hetak, jak i vy!». Spadarynia Akvilina raspaviadaje, što dzied prezidenta źjechaŭ u Danbas, kali «nas na śviecie nie było», i bolš nie viartaŭsia. Baćki jahonaha nichto ŭ vioscy taksama nie bačyŭ. Padčas vajny jaho tut dakładna nie było. Dzie stajała chata Fiodara Janukoviča — nichto nie viedaje.
Januki paśla doŭhich pošukaŭ radzimy dzieda naviedaŭ sam Viktar Janukovič. «Pryjechaŭ, z načalnikami tut byŭ. Jany sami jaho ŭhaščali. Uhaścili — jon i pajechaŭ. Nam nichto nie daŭ pahavaryć. Voś kali b da nas pryjechaŭ!..» — uzdychaje Akvilina Lavonaŭna. Žychary tolki zvoddal pahladzieli na hanarovaha hościa. A pra prezidenta viedajuć z telebačańnia.
«Tolki jon i nadajecca na prezidenta! A jany nie lubiać jaho»
«Čałaviek dobry, udały… Tolki jon i nadajecca na prezidenta! A jany nie lubiać jaho. Jon ža starajecca, kab padniać krainu. Razumny, tałkovy čałaviek… A nam i Łukašenka nie błahi, dobry. Nam usiaho chapaje. A jaho i ŭ Miensku pałova nie lubić. A čaho nie lubiać? Moža, kab pažyli b u vajnu, pahaładali, dyk i lubili b usie», — uśmichajecca haspadynia.
Janukovičy dahetul trymajuć karovu, na łancuhu sabaka. Staryja nie mieli siemjaŭ cełaje žyćcio. Praź jakiści čas i ŭ hetaje chacie nichto nie ŭzhadaje pra minuŭščynu.
«Heta fejk z pačatku da kanca»
Historyk Alaksandr Hiełahajeŭ śpiecyjalizujecca na historyi Biełarusi časoŭ Druhoj suśvietnaj vajny. Jon miarkuje, što «dakumienty» vyhladajuć vielmi nienaturalna. «Vilejski» dakumient ź dziŭnaju pamyłkaju ŭ słovie «Radaškovičy» ŭvohule padobny da niaŭdałaha fotašopa. Niama spasyłak na sučasnyja archivy, dzie jany musiać raźmiaščacca. Da taho ž baćka Janukoviča, pavodle tych źviestak, jakija jość u internecie, naradziŭsia ŭžo na Danbasie, kudy pierabraŭsia jašče jahony dzied. Na moj pohlad, heta fejk na 100%».
Žurnalist Kastuś Šytal taksama miarkuje, što hetyja dakumienty — padrobka. Svaju dumku jon tłumačyć nieadpaviednaściu peŭnych terminaŭ i času ŭ hetych zhadkach.
«Padčas akupacyi hienieralnaja akruha Biełaruś dzialiłasia na akruhi, a nie vobłaści. «Ziamielnyja adździeły» byli ŭ orhanach SSSR, a nie ŭ akupacyjnaj administracyi, — piša Kastuś na svajoj staroncy ŭ «Facebook'u». – Nu, i samy pierakanaŭčy arhumient: vioska Januki stała naležać Viciebskaj vobłaści tolki ŭ 1960 hodzie. U 1945-m jana naležała Połackaj».
