«Kali vy chočacie čarhovy prajekt, pałovu, jak minimum, paviesić na biudžet, u mianie takich hrošaj niama», — skazaŭ Łukašenka na naradzie adnosna kitajska-biełaruskaha industryjalnaha parku.
Alaksandr Łukašenka padkreśliŭ, što pry stvareńni parku nieabchodna zychodzić vyklučna z pytańniaŭ ekanomiki. «Mnie tut nijakaja palityka nie patrebna. U mianie niama hrošaj na takuju palityku. Heta pavinien być vyklučna kamiercyjny prajekt.
Kali kitajcy kamuści davali kredyt pad 2,5—3 pracenty, to pad 5—6 pracentaŭ my kredyty brać u ich nie budziem. Voś u čym pavinna być palityka, — narakaŭ Łukašenka.
— Heta pavinien być kamiercyjny prajekt. I pieršy, chto ŭ hetym pavinien być zacikaŭleny, — heta KNR. Im vielmi važny i patrebny hety prajekt. Im treba vychodzić u hetu častku płaniety, dzie ŭ ich niama pazicyj. My pradastaŭlajem takuju mahčymaść», — pierakonvaŭ Łukašenka ministraŭ. Vidać, Kitaj niedastatkova praniksia vyhadnaściu dla siabie hetaha prajekta.
Łukašenka ŭ suviazi z hetym nahadaŭ, što ŭ Sočy ŭ jaho adbyłasia paŭtarahadzinnaja sustreča sa Staršynioj KNR Si Czińpinam.
Michaił Miaśnikovič zajaviŭ, što kurs na stvareńnie parku zastajecca niaźmienny. Ale ž umovy dla inviestaraŭ pavinny być pryvabnymi, skazaŭ jon.
«My dali terytoryju, my hatovy padrychtavać adukavanych ludziej, padciahnuć haz i padvieści darohu. Ale heta ž nie značyć, što my ŭnutry hetaha parku budziem za ŭsich pracavać», — zapiarečyŭ jamu Łukašenka.
Vice-premjer Anatol Tozik pryznaŭ, što realizacyja prajekta pa stvareńni parku akazałasia namnoha składaniejšaj, čym heta bačyłasia pieršapačatkova.
Razam z tym, za paŭtara hoda paśla padpisańnia adpaviednaha ŭkaza mnohaje ŭdałosia zrabić: stvorany i pracujuć administracyja i sumiesnaja kampanija pa raźvićci parku, sfarmiravany statutny fond, raspracavany i zaćvierdžany hienieralny płan terytoryi, raspracavany detalovy płan terytoryi pieršačarhovaha asvajeńnia, viadziecca rabota pa pryciahnieńni ŭ park inviestaraŭ ź liku viadomych kampanij.
«Kancepcyja parku praduhledžvaje stvareńnie faktyčna novaha horada, jaki budzie spałučać vytvorčuju, žyłuju, sacyjalnuju, administracyjnuju infrastrukturu. Udakładnienaja płošča parku składzie 91 kv. km. Płanavanaja ahulnaja kolkaść nasielnictva — 155 tysiač», — dałažyŭ vice-premjer.
Pavodle jaho słoŭ, užo ŭ hetym hodzie płanujecca pačać budaŭnictva pieršaha abjekta — administracyjna-vystavačnaha kompleksu.
Staršynia Minabłvykankama Siamion Šapira ŭ svaim dakładzie akcentavaŭ uvahu na nieabchodnaści źnižeńnia cany kvadratnaha mietra ziamli, jakaja budzie pradastaŭlacca inviestaram. Anałahičnyja parki ŭ Jeŭropie prapanujuć učastki z koštam adnaho kvadratnaha mietra pryblizna $50. «My pavinny nabližacca da $40—45. Tady ŭ inviestaraŭ budzie cikavaść prychodzić na hetu terytoryju ź inviestycyjami. Dumaju, zaraz chutčejšymi tempami pačniom tut ruchacca. Našy prajektnyja instytuty pačali ŭžo rabotu», — adznačyŭ Šapira.
Na dumku pamočnika prezidenta Kiryła Rudaha, umovy raboty ŭ industryjalnym parku pavinny pryncypova adroźnivacca ad tych, jakija isnujuć u svabodnych ekanamičnych zonach.
«U parku pavinny być supiersučasnyja łabaratoryi i pracavać budučyja nobieleŭskija łaŭreaty. Tak u śviecie pracujuć takija parki, jany kankurujuć adzin z adnym i chutčej za inšych imknucca pryciahnuć samaje lepšaje ŭ śviecie», — maryć pamočnik prezidenta.
Pavodle jaho słoŭ, adna z hałoŭnych prablem — heta terminy, i ŭ rabocie ź inviestarami nieabchodna bolš apieratyŭna vyrašać techničnyja pytańni, pakolki biźnies nie budzie čakać čatyry abo piać hadoŭ. U jakaści stanoŭčaha prykładu Kirył Rudy pryvioŭ sumiesny prajekt z kitajskaj kampanijaj «Džyli», dzie baki davoli chutka vyjšli na vypusk pradukcyi.
Ministr zamiežnych spraŭ Uładzimir Makiej dałažyŭ, što ŭsim pasolstvam dadzieny kankretnyja ŭkazańni pa rabocie z patencyjalnymi inviestarami. «Usie inviestary pytajucca, kali budzie infrastruktura, kali možna budzie pahladzieć kankretna, dzie advodzicca miesca i na jakich umovach», — adznačyŭ jon.
«Enierhazabieśpiačeńnie jość, hazazabieśpiačeńnie jość, pa suviazi taksama vyrašana. My pačniom praktyčnuju realizacyju letam biahučaha hoda», — skazaŭ Michaił Miaśnikovič.
Padvodziačy vyniki narady, Alaksandr Łukašenka adznačyŭ, što na pieršym etapie niama nieabchodnaści bracca za asvajeńnie ŭsioj adviedzienaj pad park terytoryi i ŭkładać u heta lišnija srodki. «Nie treba leźci ŭ hety masiŭ. Treba pačynać z kraju, pa-haspadarsku», — skazaŭ jon.
«Vy mianie pierakanali, što nam treba pabudavać hety park, — Łukašenka zrabiŭ krajnim urad. — Ja vam pastaviŭ zadaču. Adna ŭmova: tam nie pavinna być levych kampanij. Tam pavinny być kampanii budučaha, vysokaefiektyŭnyja, vysokatechnałahičnyja pracoŭnyja miescy. Nichto z hetym nie spračajecca, i ja ad hetaha nie admaŭlajusia, — dvuchsensoŭna prahučała ad Łukašenki. — My damovilisia z raniejšym Staršynioj KNR i ciapierašni jašče bolšy prychilnik našaha supracoŭnictva», - adznačyŭ jon.
«Ale paŭstaje pytańnie: my što, heta budziem budavać za svaje hrošy? Ale hrošy my im dać nie možam. U nas niama svabodnych hrošaj, niama tannych kredytaŭ. I nie treba. Hetyja hrošy jość u KNR, im treba hrošy puskać u abarot», — dadaŭ Łukašenka.