U internecie źjavilisia pieršyja kadry filma «Biełyja Rosy. Viartańnie» –
svojeasablivaha praciahu stužki 1983 hoda. Hałoŭnyja roli ŭ novym filmie vykonvajuć Pavieł Charłančuk, Siarhiej Žbankoŭ i Andrej Miarźlikin.
Film «Biełyja Rosy. Viartańnie» vyjdzie na ekrany viasnoj 2014 hoda. Pavodle sinopsisa, jaki źjaviŭsia ŭ internecie, siužet maje ahulnyja linii ź pieršym filmam.
Pažyŭšy ŭ horadzie, adzin z hierojaŭ papiaredniaha filma — Andrej Chodas (jaho ihraje Juozas Budrajcis)- viartajecca da ziamli i sielicca ŭ małoj viosačcy. Adnak horad nahaniaje jaho. Para maładych biznesoŭcaŭ źbirajucca vykupić malaŭničy kutok dla budaŭnictva sanatoryja, a niešmatlikich žycharoŭ vioski — vysielić. Stary Andrej dapamahaje ŭsioj siamji ŭspomnić pra karani i razbłytać prablemy ŭ adnosinach, jakija zdavalisia nievyrašalnymi ŭ mituślivaj atmaśfiery haradskoha žyćcia.
Asnovu scenara dla novaha filma napisaŭ dramaturh Alaksiej Dudaraŭ, aŭtar i kłasičnych «Biełych Rosaŭ». Pavodle jaho słovaŭ, scenar paśla istotna pierarablaŭsia. U pryvatnaści, u pieršym varyjancie biznesoviec byŭ adzin i źbiraŭsia budavać na miescy Biełych Rosaŭ nie sanatoryj, a katedžny pasiołak. Nieviadoma, ci zachavałasia ŭ vynikovaj viersii i asacyjatyŭnaje proźvišča biznesoŭca — Rusačenka.
Pieśnia hurtu J;Mors, klipam da jakoj stali pieršyja kadry filma, praŭda, u samu stužku nie trapić.
Pytańnie, na jakoje pakul niama adkazu: dla kaho novy film?
«Biełyja Rosy» 1983 hoda ŭ lohkaj formie pakazvali, jak u Biełarusi adbyvałasia ŭrbanizacyja. Hety praces zakranuŭ sotni tysiač ludziej. I hledačy — učorašnija viaskoŭcy, zaŭtrašnija haradžanie — paznavali siabie i svaich rodnych u hierojach filma. Jon čaplaŭ ich.
Pra novy film ciažka mierkavać pa klipie. Ale
z narezki vidać, što kino budzie pryśviečanaje žyćciu sacyjalnaj katehoryi, jakaja zaviecca «ofisny płankton».
U kadry — ofisy, modnyja kłuby, «cud niekranutaj pryrody» i chutaranki ź minskim makijažam.
Ale «płankton» i biznesoŭcy naŭrad ci buduć kino hladzieć, paznavać siabie i, hałoŭnaje, vieryć. Kab pafasny biznesoviec pierajechaŭ ź Minska ŭ viosku, dzie niama «Dazary» i prybiralnia na vulicy? Nie śmiašycie.
