Śpiecyjalisty Maładziečanskaha rehijanalnaha turystyčnaha centra raspracavali ekskursijny maršrut pa miescach prachodžańnia linii frontu Pieršaj suśvietnaj vajny.
U čas ekskursii amatary historyi naviedajuć Vilejku, Zabrodździe i Smarhoń, ubačać akopy i inšyja abarončyja zbudavańni, naviedajuć pachavańni sałdat, pačujuć cikavy apovied pra padziei, što razhortvalisia tut sto hadoŭ tamu.
Dapamohu ŭ raspracoŭcy maršrutu akazali supracoŭniki Vilejskaha i Smarhonskaha krajaznaŭčych muziejaŭ.
Miarkujecca, što maršrut budzie zapatrabavany jak žycharami našaj krainy, tak i zamiežnymi turystami, u pieršuju čarhu - hramadzianami Rasii, Polščy i Hiermanii.
– Sioleta spaŭniajecca 100 hadoŭ z pačatku Pieršaj suśvietnaj vajny. Na terytoryjach sučasnych Vilejskaha i Smarhonskaha rajonaŭ razhortvalisia samyja krovapralitnyja vajennyja apieracyi. Varta ŭspomnić, naprykład, likvidacyju Śviancianskaha praryvu (vierasień-kastryčnik 1915 hoda) abo hieraičnuju abaronu Smarhoni. Ruskija vojski ŭtrymlivali hety horad 810 dzion - ź vieraśnia 1915 pa luty 1918 hoda. Zakranuła rehijon i Naračanskaja nastupalnaja apieracyja, kali ŭ sakaviku 1916 hoda za dziesiać dzion na biełaruskaj ziamli zahinuli bolš jak 75 tysiač sałdat carskaj armii. Na Maładziečanščynie baziravalisia rasijskija čaści tyłavoha zabieśpiačeńnia. Rajon mocna paciarpieŭ ad niamieckich hazavych atak, – patłumačyła dyrektar rehijanalnaha turystyčnaha centra Ł.M. Brujaka.
Pieršaja suśvietnaja vajna praciahvałasia 4 hady 3 miesiacy – z 1 žniŭnia 1914 pa 11 listapada 1918 hoda. Jaje achviarami stali 2,7 miljona paddanych Hiermanii, 1,8 – Rasii, 1,9 – Francyi, 1,8 – Aŭstra-Vienhryi, 1 miljon – Vialikabrytanii. Pa dadzienych Ministerstva abarony Biełarusi, siońnia na dziaržaŭnym ŭliku ŭ našaj krainie znachodzicca 137 voinskich pachavańniaŭ tych časoŭ.
