Radyjo Svaboda
Centrvybarkam rapartuje: za dva dni daterminovaha hałasavańnia ŭdzieł u vybarach deputataŭ miascovych Savietaŭ pryniali 9,8% vybarščykaŭ. Były kandydat u prezidenty Biełarusi Ryhor Kastusioŭ kaža ŭ razmovie z karespandentam Radyjo Racyja, što «taktyka ŭładaŭ padčas vybarčych kampanij z hadami nie źmianiajecca».
Daterminovaje hałasavańnie na vybarach praciahniecca pa 22 sakavika ŭklučna. Ryhor Kastusioŭ raspavioŭ pra jaho chadu:
«Ja razmaŭlaŭ sa mnohimi naziralnikami i sam zachodziŭ na niekatoryja vybarčyja ŭčastki. Dyk voś zaŭvažana, što na hałasavańnie niekatorych ludziej aŭtobusami pryvoziać, a navučencaŭ adpraŭlajuć hałasavać cełymi hrupami. Tamu i takija pakazčyki vysokija. Padčas hetaj vybarčaj kampanii ničoha nie źmianiłasia. Ułady dziejničajuć pa tym ž samym pryncypie, što i raniej. Da taho ž, kali vysokija pakazčyki daterminovaha hałasavańnia, to tady pry žadańni praściej manipulavać biuleteniami».
RR: Nakolki, na vaš pohlad, na samaj spravie dla ludziej cikavyja miascovyja vybary?
«Nieadnojčy ludzi zadavali mnie pytańnie: «Skažycie, a navošta naohuł pravodziacca takija vybary? Moža być, hetyja hrošy lepš nakiravać na jakija-niebudź dziciačyja damy, inšyja dobryja rečy?» I ja ŭ niejkaj stupieni z hetymi ludźmi salidarny, bo miascovyja saviety ŭ sučasnych umovach u Biełarusi praktyčna nijakaj roli nie adyhryvajuć. Heta prosta šyrma dla vyšejšych uładaŭ. Kab jany zapracavali na samaj spravie, treba adradžać miascovaje samakiravańnie i pravodzić prazrystyja vybary. Deputatami pavinny stać sapraŭdny aŭtarytetnyja asoby, a nie «prybližanyja». Voś tady na miescach budzie demakratyja», — adznačyŭ były kandydat na prezidenctva.
RR: A ci viedaje narod svaich miascovych abrańnikaŭ?
«Sioletnich kandydataŭ bolš-mienš viedajuć pa ŭlotkach, a voś dziejučych praktyčna nichto nie nazyvaje. Takija voś fantomy. Ja, naprykład, taksama nie viedaju svaich deputataŭ…»
RR: Realna taki nardep niečym moža dapamahčy prostamu čałavieku?
«Sumniavajusia. Našy deputaty ŭ asnoŭnym dublujuć miascovuju vykanaŭčuju ŭładu. Jany buduć rabić toje, što skažuć», — miarkuje spadar Kastusioŭ.
