CVK Ukrainy zarehistravaŭ 23 kandydaty ŭ prezidenty. Vybary majuć adbycca 25 maja. Siarod kandydataŭ jość absalutna roznyja ludzi. Pavodle siońniašniaha kursa, 1 hryŭnia roŭnaja 854 rubli.

Alaksandr Klimienka

Chto: Kiraŭnik Narodnaj partyi Ukrainy. Byŭ deputatam Viarchoŭnaj Rady minułaha sklikańnia ad błoku «Naša Ukraina»

Adkul: Marjinka, Danieckaja vobłaść

Uzrost: 48

Dachody: 247,4 tysiačy hryŭniaŭ za 2013 hod

Dachody siamji: 1 młn 074 tys. 545 hrn.

Što patrebna viedać: Na Klimienku dvojčy zavodziłasia kryminalnyja spravy. Pieršy raz za padrobku dakumientaŭ, u druhi – za rastratu biudžtnych srodkaŭ u asabliva bujnych pamierach.

Anatol Hrycenka

Chto: Lidar partyi Hramadzianskaja pazicyja, deputat Viarchoŭnaj Rady ad «Baćkaŭščyny», były ministr abarony Ukrainy

Adkul: vioska Bahačoŭka Čarkaskaj vobłaści

Uzrost: 56

Dachody: 438 tysiač hryŭniaŭ

Dachody siamji: 1,121 miljonaŭ hryŭniaŭ

Što patrebna viedać: Prazachodnich pohladaŭ, za ŭstupleńnie Ukrainy ŭ NATO, ale nie ciapier. Žanaty z žurnalistkaj Julijaj Mastavoj, hałoŭnaj redaktarkaj papularnaj haziety «Dzierkało tižnia».

Andrej Hrynienka

Chto: biznesmen, dahetul u palitycy siabie nie prajaŭlaŭ

Adkul: Charkaŭ

Uzrost: 44

Dachody: 5,5 miljonaŭ hryŭniaŭ

Dachody siamji: 4,5 miljony hryŭniaŭ

Što patrebna viedać: Prahramy nie maje. Kaža, što choča danieści da ludziej «praŭdu ab tym, što adbyvajecca va Ukrainie». Fiederalizacyju Ukrainy nie padtrymlivaje.

Vadzim Rabinovič

Chto: pradprymalnik, prezident Usieŭkrainskaha jaŭrejskaha kanhresa

Adkul: Charkaŭ

Uzrost: 60

Dachody: 1 miljon hryŭniaŭ

Dachody siamji: 252 tysiačy hryŭniaŭ

Što patrebna viedać: Zajmaŭsia handlem hazu z Rasii, za ekanamičnyja złačynstvy na niejki čas pazbaŭlaŭsia ŭkrainskaha hramadzianstva. Byŭ uładalnikam futbolnaha kłuba «Arsienał» (Kijeŭ).

Valeryj Kanavaluk

Chto: Hienieralny dyrektar «Centra antykryzisnych prahram», ekanamist

Adkul: Danieck

Uzrost: 47

Dachody: 55 tysiač hryŭniaŭ

Dachody siamji: 107 tysiač hryŭniaŭ

Što patrebna viedać: Trojčy byŭ deputatam Viarchoŭnaj Rady, dzie «abaraniaŭ intaresy danieckich», kolišni člen Partyi rehijonaŭ.

Vasil Kujbida

Chto: Lidar Narodnaha ruchu Ukrainy, były mer Lvova, były ministr rehijanalnaha raźvićcia

Adkul: Naradziŭsia ŭ Komi ASSR u siamji ŭkraincaŭ

Uzrost: 55

Dachody: 229 tysiač hryŭniaŭ

Dachody siamji: adsutničajuć

Što patrebna viedać: Aŭtar bolš za 150 materyjałaŭ pa matematycy, ekanomicy, budaŭnictvu, pravaznaŭstvu. Zasłužany juryst Ukrainy, aŭtar piaci paetyčnych zbornikaŭ. Kavaler ordena Jarasłava Mudraha za značny ŭniosak u dziaržaŭnaje budaŭnictva.

Vasil Cuško

Chto: Były staršynia Antymanapolnaha kamiteta Ukrainy, były ministr ekanomiki, były ministr unutranych spravaŭ

Adkul: vioska Nadrečnaje Adeskaj vobłaści

Uzrost: 51

Dachody: 176 tysiač hryŭniaŭ

Dachody siamji: 2,6 miljona hryŭniaŭ

Što patrebna viedać: Naradziŭsia ŭ małdaŭskamoŭnaj vioscy. Byŭ siabram Sacyjalistyčnaj partyi Ukrainy, vystupaŭ za ŭviadzieńnia padatku na bahaćcie. Pry Janukoviču ŭznačalvaŭ Antymanapolny kamitet.

Uładzimir Saranaŭ

Chto: biznesoviec

Adkul: vioska Kłaŭdzijeva-Tarasava Kijeŭskaj vobłaści

Uzrost: 49

Dachody: 14 tysiač hryŭniaŭ. Pry hetym letaś jon nabyŭ sabie jachtu za 3 miljony hryŭniaŭ i Mercedes S.

Dachody siamji: 125 tysiač hryŭniaŭ

Što patrebna viedać: Małaviadomy kandydat abiacaje adnavić u krainie «absalutnuju spraviadlivaść», a taksama likvidavać deputackuju niedatykalnaść.

Dźmitryj Jaraš

Chto: Lidar «Pravaha siektara»

Adkul: Dniepradziaržynsk

Uzrost: 42

Dachody: 0 (va ŭłasnaści kvatera 46,4 kvadratnych mietra, a taksama mašyna Skoda Octavia 2009).

Dachody siamji: 0 (va ŭłasnaści kvatera 53,9 kvadratnych mietry, a taksama mašyna Opel Astra 2006).

Što patrebna viedać: Lidar ukrainskich nacyjanalistaŭ. Doŭhi čas uznačalvaŭ patryjatyčnuju arhanizacyju «Tryzub». Ciapier vystupaje jak hałoŭnaja strašyłka na rasijskich telekanałach.

Zoran Škirak

Chto: Były deputat Kijeŭskaj haradskoj rady

Adkul: Užharad

Uzrost: 43

Dachody: 0 (vałodaje kvateraj, a taksama dvuma aŭtamabilami)

Dachody siamji: 0

Što patrebna viedać: Aktyŭny ŭdzielnik kijeŭskaha Jeŭramajdanu.

Michaił Dobkin

Chto: Były hubiernatar Charkaŭskaj vobłaści

Adkul: Charkaŭ

Uzrost: 44

Dachody: 21 miljon hryŭniaŭ

Dachody siamji: 18 miljonaŭ hryŭniaŭ

Što patrebna viedać: Charyzmatyčny hubiernatar Charkaŭščyny vystupaje za ŭnitarnaść Ukrainy, ale za nadańnie ruskaj movie status dziaržaŭnaj. Kandydat na vybarach ad Partyi rehijonaŭ. Vialikuju słavu ŭ internecie nabyŭ z videa pieradvybarčaha vystupu, dzie nie moh źviazać niekalki słovaŭ, a taksama ŭžyvaŭ šmatlikuju kolkaść mataŭ. «U ciabie tvar niecikavy, tabie hrošaj nie daduć», — vučyŭ jaho pamočnik, jaki z časam zdabudzie pasadu mera Charkava.

Natalla Karaleŭskaja

Chto: Były ministr sacyjalnaj palityki, lidar partyi «Ukraina – napierad!»

Adkul: Łuhanskaja vobłaść

Uzrost: 38

Dachody: 191 tysiača hryŭniaŭ

Dachody siamji: 1 miljon hryŭniaŭ

Što patrebna viedać: U 2004 hodzie padčas apytańnia Karaleŭskuju nazvali «Lidar siaredniaha biznesa hoda». Zajmała vysokaje miesca ŭ śpisie samych upłyvovych žančyn Ukrainy (u 2010 – piatnaccataje). Bahaćcie Karaleŭskaj aceńvajecca 235 miljonaŭ dalaraŭ. Adnojčy jana skazała, što z nacyjanalistami joj nie pa darozie, svaje palityčnyja pohlady identyfikuje jak sacyjał-demakratyčnyja.

Mikałaj Małamuž

Chto: Były kiraŭnik Słužby zamiežnaj vyviedki Ukrainy

Adkul: Čarkaskaja vobłaść

Uzrost: 58

Dachody: 313 tysiač hryŭniaŭ

Dachody siamji: 2,771 miljona hryŭniaŭ (ź ich 2,564 miljona — heta spadčyna, što atrymała žonka Małamuža).

Što patrebna viedać: Byŭ kiraŭnikom vyviedki pry Juščanku, a pry Janukoviču — pazaštatnym daradcam.

Aleh Laško

Chto: Lidar Radykalnaj partyi, narodny deputat

Adkul: Čarnihaŭ

Uzrost: 41

Dachody: 195 tysiač hryŭniaŭ

Dachody siamji: 0

Što patrebna viedać: Doŭhi čas pracavaŭ žurnalistam. Aktyŭny ŭdzielnik Majdanu. Adzin ź niamnohich ukrainskich palitykaŭ, chto ŭ sakaviku sioleta prysutničaŭ u Krymie. U svaich palityčnych metach nazyvaje razryŭ dypłamatyčnych adnosin z Rasijaj.

Ukrainski Žyrynoŭski, ale libieralnaha tołku.

Aleh Ciahnibok

Chto: lidar Usieŭkrainskaha abjadnańnia «Svaboda»

Adkul: Lvoŭ

Uzrost: 45

Dachody: 243 tysiačy hryŭniaŭ

Dachody siamji: 59 tysiač hryŭniaŭ

Što patrebna viedać: Da źjaŭleńnia «Pravaha siektara» ličyŭsia samym radykalnym palitykam Ukrainy. Vystupaje za zabaronu kamunistyčnaj ideałohii. Pa adukacyi — doktar. U Rasii na Ciahniboka zaviedzienaja kryminalnaja sprava za dačynieńnie da «bandy, jakaja vajavała za čačenskich sieparatystaŭ». Byŭ siarod tych lidaraŭ apazicyi, što ŭznačalvali pieramovy ź Janukovičam.

Aleh Caroŭ

Chto: Narodny deputat ad Partyi rehijonaŭ

Adkul: Dnieprapiatroŭsk

Uzrost: 43

Dachody: 234 tysiačy hryŭniaŭ

Dachody siamji: šeść kvateraŭ, dom, piać ziamielnych učastkaŭ

Što patrebna viedać: Byŭ aktyŭny praciŭnikam Majdanu. Prapanoŭvaŭ Słužbie biaśpieki Ukrainy zrabić piersonami non hrata vialikuju kolkaść zamiežnych hramadzian, jakija, na jahonuju dumku, finansavali Majdan. 18 lutaha ŭ samym pačatku šturmu hučna zajaviŭ, što «ciaham hadziny Majdan budzie začyščany».

Volha Bahamolec

Chto: Lekarka, aktyvistka Majdana, dačka viadomaha ŭkrainskaha akademika

Adkul: Kijeŭ

Uzrost: 48

Dachody: 3,3 miljona hryŭniaŭ

Dachody siamji: 1,1 miljona hryŭniaŭ

Što patrebna viedać: Aktyŭna dapamahała ŭdzielnikam Majdanu miedycynskaj dapamohaj, jaje nazyvali «lidaram miedyčnaj sotni». Admoviłasia zaniać pasadu vice-premjera pa humanitarnych pytańniach. Sama rodam sa staražytnaha roda Alifiarovičaŭ-Bahamolcaŭ, jaki pachodzić ź Viciebščyny. Viadomaja nie tolki jak doktarka-dermatołah, a i jak vykanaŭca ŭkrainskich ramansaŭ. U jaje čaćviora dziaciej.

Piatro Parašenka

Chto: Zasnavalnik karparacyi Roshen, narodny deputat, były ministr zamiežnych spravaŭ

Adkul: Bołhrad Adeskaj vobłaści

Uzrost: 48

Dachody: 52 miljony hryŭniaŭ

Dachody siamji: 52 tysiačy hryŭniaŭ

Što patrebna viedać: Adzin z najbahaciejšych ludziej Ukrainy. Pa viersii časopisa Forbes, jon zajmaje 5-aje miesca siarod miljarderaŭ krainy i vałodaje 1,8 miljarda dalaraŭ. Pieršy kapitał zarabiŭ na pastaŭkach kakava-baboŭ. Źjaŭlajecca ŭłaśnik telekampanii «5 kanał». Jaho kandydaturu na vybarach padtrymaŭ baksior Vital Kličko. 

Piatro Simanienka

Chto: Lidar Kamunistyčnaj partyi Ukrainy

Adkul: Danieck

Uzrost: 61

Dachody: 314 tysiač hryŭniaŭ

Dachody siamji: Majuć dźvie kvatery

Što patrebna viedać: Užo bolš za 20 hadoŭ uznačalvaje ŭkrainskich kamunistaŭ. Heta ŭžo čaćviortyja vybary, na jakich udzielničaje Simanienka. U 1999 hodzie zaniaŭ druhoje miesca, za jaho prahałasavała 37,8% vybarcaŭ. Vystupaje za nacyjanalizacyju bujnych pradpryjemstvaŭ, a taksama za ŭvachodžańnie Ukrainy ŭ Mytny sajuz.

Renat Kuźmin

Chto: Były pieršy namieśnik hienieralnaha prakurora Ukrainy

Adkul: Danieck

Uzrost: 46

Dachody: 1,3 miljona hryŭniaŭ (amal 800 tysiač nieviadoma adkul)

Što patrebna viedać: Pad kiraŭnictvam Kuźmina byli nakiravanyja ŭ sud spravy Julii Cimašenki, Juryja Łucenki. Zavodziŭ kryminalnuju spravu suprać byłoha prezidenta Leanida Kučmy. Byŭ namieśnikam słavutaha hienprakurora Pšonki, asabniak jakoha mnohich ździviŭ.

Siarhiej Cihipka

Chto: Narodny deputat ad Partyi rehijonaŭ, były vice-premjer

Adkul: Naradziŭsia ŭ Małdaŭskaj SSR

Uzrost: 54

Dachody: 263 miljony hryŭniaŭ

Dachody siamji: 8,6 miljona hryŭniaŭ

Što patrebna viedać: Pa acenkach časopisa Forbes, jahony kapitał składaje 1,1 miljarda dalaraŭ. Viadomy bankir. U 2004 uznačalvaŭ vybarčy štab Viktara Janukoviča. U 2010 samastojna ŭdzielničaŭ u vybarach, dzie zaniaŭ treciaje miesca z 13% hałasoŭ, paźniej padtrymaŭ Viktara Janukoviča.

Julija Cimašenka

Chto: Byłaja premjer-ministr, lidarka abjadnańnia «Baćkaŭščyna»

Adkul: Dnieprapiatroŭsk

Uzrost: 53

Dachody: 180 tysiač hryŭniaŭ

Što patrebna viedać: Daŭno ŭ palitycy. Była paplečnicaj byłoha prezidenta Viktara Juščanki, premjer-ministram. U 2010 sastupiła ŭ druhim tury prezidenckich vybaraŭ Viktaru Janukoviču. U žniŭni 2011 aryštavanaja pa «hazavaj spravie». Asudžanaja na 7 hadoŭ turemnaha źniavoleńnia. Vyzvalenaja paśla pieramohi Majdana. Uvachodzić u TOP-100 samych bahatych ukraincaŭ.

Juryj Bojka

Chto: Były vice-premjer

Adkul: Horłaŭka, Danieckaja vobłaść

Dachody: 400 tysiač hryŭniaŭ

Dachody siamji: 17 miljonaŭ hryŭniaŭ

Što patrebna viedać: Hieroj Ukrainy (za vydatnyja dasiahnieńni ŭ raźvićci paliŭna-enierhietyčnaha kompleksu Ukrainy). Va ŭradzie Azarava vykonvaŭ abaviazki vice-premjera.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?