Uviečary 6 krasavika na Pryvakzalnaj płoščy ŭ Viciebsku hrupa nieviadomych asobaŭ raspaŭsiudžvała siarod miascovych aŭtamabilistaŭ dziaržaŭnyja rasijskija ściažki.
Čałaviek z rukzakom za plačyma prapanoŭvaŭ simvoliku susiedniaj dziaržavy kiroŭcam, jakija spynilisia na śvietłafory kala tramvajnaha prypynku na vulicy Kasmanaŭtaŭ. Niekatoryja aŭtamabilisty, da prykładu, vadziciel chutkaj dapamohi, žadali atrymać ściažok i uzmacham ruki sami zaprašali padyści da ich vałanciora hetaj akcyi. Na Pryvakzalnaj płoščy karespandent taksama zaŭvažyŭ niekalki taksi z rasijskimi ściahami ŭ sałonie.
Nieviadomy raspaŭsiudnik, zaŭvažyŭšy, što jaho zdymajuć, vyrašyŭ daviedacca, čamu apynuŭsia ŭ centry ŭvahi. Na pramoje pytańnie, navošta jon uručaje biełaruskim kiroŭcam simvoliku susiedniaj krainy, dvuchmietrovy chłopiec znakami pakazaŭ, što nie razumieje pytańnia, bo źjaŭlajecca hłuchaniamym. Naprykancy nieznajomy tknuŭ palcam u siaredzinu svajho iłba. Što jon chacieŭ hetym skazać, zastałosia nieviadoma.
Paśla hetaha vałancior zharnuŭ ściažki, što zastalisia, i syšoŭ u bok vakzała, dzie jaho čakali paplečniki pa ahulnaj spravie. Abmianiaŭšysia aktyŭnym žestykulavańniem i raźvitaŭšysia, adzin z tavaryšaŭ adpraviŭsia ŭ bok vulicy Kirava. A dvoje inšych, z zaplečnikami, — pajšli na vakzał. Ich razmova adbyvałasia pry ŭdziele miascovych taksistaŭ. U tryccaci mietrach ad ich stajała dziažurnaja mašyna DPS.
Heta ŭžo nie pieršy vypadak, kali ŭ Viciebsku adbyvajucca padobnyja akcyi. U sakaviku fota ź dźviuch akcyj pa razdačy rasiejskich ściažkoŭ viciebskim kiroŭcam zrabiŭ i vykłaŭ u svoj Fejsbuk pravaabaronca Pavieł Levinaŭ. Adna z akcyj adbyvałasia kala płoščy Pieramohi ŭ sakaviku. Dziaŭčyna, što prapanoŭvała trykałory uładalnikam transpartnych srodkaŭ, taksama rabiła vyhlad, što nie razumieje ci nie čuje svajho surazmoŭcu.