«Naša Niva»: Jak nazyvać toje, što siońnia adbyvajecca va Uschodniaj Ukrainie?

Siarhiej Vysocki: Jość dva varyjanty. Adny nazyvajuć heta vajnoj. Inšyja, u tym liku i ja, — dyviersijaj (ahresijaj), u jakoj vykarystoŭvajucca vojski Rasijskaj Fiederacyi. Tut chacieli praviarnuć toj samy varyjant, što ŭ Krymie. Kali rasijskija vajskoŭcy dziejničali pad vyhladam miascovaj samaabarony. Ale ŭ hetych ludziej navat mova biez ukrainskaha akcentu. Jość videa z Kramatorska, dzie taki «bajec samaabarony» ŭžyvaje zamiest «bardziura» słova «poriebrik», jakoje ŭžyvajecca tolki ŭ Sankt­Pieciarburhu. My majem spravu z padrychtavanaj dyviersijaj.

«NN»: A ŭ čym adroźnieńni ad Kryma?

SV: U Krymie byŭ Čarnamorski fłot, tam ad pačatku było bolš rasijskich vajskoŭcaŭ. Krym, u pryncypie, vielmi prosta adrezać ad macieryka — jość tolki dva pierašyjki. U Daniecku ž jość miaža z Rasijaj, chaj kiepska abaraniajecca, ale jana jość.

Na siońniašni dzień, pa našych acenkach, va Uschodniaj Ukrainie dziejničaje kala 200 rasijskich dyviersantaŭ.

Pa vynikach apošnich sacapytańniaŭ, tolki kala 18% žycharoŭ Danieckaj vobłaści chočuć uvajści ŭ skład Rasii [pa pierapisie 2001 hoda dola etničnych ruskich składała 39% u Łuhanskaj i 38% u Danieckaj abłaściach — NN]. Heta mienšaść, ale vielmi aktyŭnaja mienšaść, jany vierać u Pucina i chočuć žyć u Rasii. Jašče jość miascovaja ahientura, jakuju šmat hadoŭ pieściła Rasija.

«NN»: Heta chto?

SV: Voś prykład z Charkava, dzie mitynhi za fiederalizacyju Ukrainy pravodziŭ tak zvany palitołah Kanstancin Dałhoŭ, jaki pracavaŭ na kuma Pucina Viktara Miedviedčuka.

Darečy, zabyŭsia skazać pra jašče adnu prasłojku, što vystupajuć za Rasiju, — heta miascovyja bandyckija sietki.

Tyja samyja, jakija kaardynavaŭ syn Janukoviča Alaksandr. Siońnia jon robić toje samaje. Tyja, što stajać u ačapleńni administracyjnych budynkaŭ, majuć standartnuju taksu — 500 hryŭniaŭ (kala 400 tysiač rubloŭ) za dzień.

«NN»: Kali za Rasiju mienšaść, dyk bolšaść maŭčyć? Bajacca?

SV: Jany pasiŭnyja. Danbas — heta vielmi depresiŭny rehijon.

U saviecki čas tudy pierasialalisia ludzi z roznych rehijonaŭ SSSR. Heta najbolš kryminalny, urbanizavany rehijon Ukrainy. U 90­ia hady rej tam viali bandyty. Usia pryvatnaja inicyjatyva była zadušanaja. Aktyŭnych biznesmienaŭ, što nie chacieli žyć pa bandyckich praviłach, prosta zabivali. Žurnalistaŭ — taksama. Atrymlivajecca takaja «vypalenaja ziamla». U Danbasie niama siaredniaha kłasa, taho, što byŭ ruchalnaj siłaj kijeŭskaha Majdanu, niama bazy dla pratestaŭ.

U mianie tam žyvuć svajaki. Jany abyjakavyja da losu rehijona. Pryj­dzie Pucin — nu i ładna. Zastaniecca Ukraina — chaj budzie tak. Dy i bajacca taksama.

Prajšoŭ mitynh suprać fiederalizacyi ŭ Maryupali. Udzielnikaŭ mocna pabili. Šaściora čałaviek trapili ŭ reanimacyju. Hetaksama žorstka buduć abychodzicca i ź inšymi akcyjami.

«NN»: Rola Janukoviča ŭ padziejach na ŭschodzie vialikaja?

SV: Vialikaja. Ź jaho dapamohaj Rasija spadziajecca niejak lehitymizavać hetyja padziei. Jość spadziavańni pryvieźci jaho na ŭschod i zrabić kiraŭnikom «dziaržavy» kštałtu Prydniastroŭja. Janukovič i jahony syn finansujuć častku vystupaŭ.

«NN»: Darečy, a čamu, na Vaš pohlad, idzie admaŭleńnie ad idei dałučeńnia Daniecka i astatniaha ŭschodu da Rasii?

SV: Rasija ŭ Krymie sutyknułasia z mnostvam prablemaŭ, jakich nie čakała. Jana atrymała datacyjny rehijon ź nie zusim łajalnym nasielnictvam. Im treba pasprabavać spačatku pieravaryć Krym, a razam z Danbasam jość imaviernaść, što možna i padavicca.

«NN»: Jaki Vaš prahnoz? Dzie spynicca Rasija?

SV: Nie viedaju. Jak ukrainiec, ja vieru, što maja kraina zastaniecca cełasnaj i sabornaj. Što razam ź mižnarodnaj supolnaściu nam udasca abaranić jaje ad ahresara. Ale ciapierašnija padziei całkam vyjšli z racyjanalnaha pola. I na kaho nastupnaha nakiniecca varjat ź siakieraj, nichto nie viedaje. Ja nie padzialaju dumku, što Danbas užo stračany — heta vializny rehijon z 9­-miljonnym nasielnictvam, a zachoplena ŭsiaho niekalki administracyjnych bu­dynkaŭ. Jašče ŭsio mahčyma.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?