Alaksandr Coj padaŭ zajavu ŭ Śledčy kamitet na deputata Dziarždumy Jaŭhiena Fiodarava.

Syn Viktara Coja prosić pryciahnuć parłamientaryja da kryminalnaj adkaznaści za paklop u suviazi z raspaŭsiudam videazapisu, na jakim parłamientaryj śćviardžaje, što Coj supracoŭničaŭ z CRU.

Pra heta paviedamiŭ advakat, jaki pradstaŭlaje intaresy zajaŭnika, Anatol Kučarena.

Jaŭhienij Fiodaraŭ ličyć, što Viktar Coj, na čyjoj tvorčaści vyrasła nie adno pakaleńnie rasiejcaŭ i žycharoŭ byłoha SSSR, byŭ zavierbavany ahientami CRU, pracavaŭ pa płanie razvału krainy, a jaho apošnija pieśni pisali ŭ Halivudzie.

Kučarena paviedamiŭ, što nakiravaŭ deputatu aficyjny list z zaklikam paprasić prabačeńnia pierad svajakami i blizkimi Coja, i papiaredziŭ, što ŭ advarotnym vypadku suprać jaho moža być raspačata kryminalnaja sprava ab paklopie.

U svaju čarhu Fiodaraŭ zajaviŭ, što nikoli nie kazaŭ ab supracoŭnictvie rok-muzyki z ahientami CRU i tamu nie ličyć patrebnym prasić prabačeńnia pierad jaho svajakami. Jon taksama dadaŭ, što maje namier nakiravać u śledčyja orhany zapyt u dačynieńni da ŚMI, što raspaŭsiudžvajuć takuju paklopnickuju infarmacyju.

«Alaksandr Coj siońnia padaŭ zajavu ŭ Śledčy kamitet Rasii z prośbaj pryciahnuć deputata Dziarždumy Jaŭhiena Fiodarava da kryminalnaj adkaznaści za ŭčynieńnie złačynstva, praduhledžanaha č. 2 art. 128.1 KK RF», - skazaŭ Kučar.

Syn muzyki pakazvaje, što deputat Fiodaraŭ u ramkach svajho intervju paviedamiŭ zahadzia iłžyvyja źviestki, jakija haniać honar i hodnaść Viktara Coja.

«Infarmacyja, raspaŭsiudžanaja Fiodaravym, źjaŭlajecca zahadzia iłžyvaj, nie adpaviadaje rečaisnaści i zasnavanaja na čutkach i plotkach, źnievažaje pamiać Viktara Coja, a taksama zakranaje maje honar i hodnaść jak jaho syna», - havorycca ŭ jaho zajavie.

Akramia taho, Alaksandr Coj nakiravaŭ zajavu staršyni kamisii Dziarždumy pa pytańniach deputackaj etyki Alaksandru Dziehciarovu, u jakim prosić razhledzieć hety vypadak, prapanavać parłamientaryju prynieści publičnyja prabačeńni siamji Viktara Coja, a taksama ŭ adras jaho prychilnikaŭ, raspaŭsiudzić u ŚMI infarmacyju ab fakcie parušeńnia Fiodaravym praviłaŭ deputackaj etyki i pazbavić jaho prava vystupać na pasiadžeńniach pałaty.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?