Reuters.com
Žurnalist resursa horki.info pahutaryŭ z uradženkaj horada Horki (Mahiloŭskaja vobłaść), jakaja mnohija hady žyvie sa svajoj siamjoj u Danbaskim rehijonie. Ź mierkavańniaŭ biaśpieki, imia i proźvišča jaje nie nazyvajecca.
— Što adbyvajecca ŭ Daniecku siońnia?
— Danieck ciapier — u błokpastach. My siońnia pakul prajechali na daču z centra horada da ŭskrainy, pierasiekli ich try ci čatyry. Nas spyniali, ale nie milicyja abo vajennyja… Ułady niama — takaja realnaść.
Pry hetym u žyćci abyvaciela pa vialikim rachunku ničoha nie źmianiłasia. Rynki, kramy, škoły i VNU — usie funkcyjanujuć. Ceny, praŭda, pavysilisia, ale nie vielmi. Piensii vypłačvajucca.
— Učora pavodle paviedamleńniaŭ ŚMI ŭ vas prachodziŭ «refierendum» ab dałučeńni da Rasii. Heta realnaść abo fikcyja?
— «Refierendum» byŭ nie ab dałučeńni da Rasii, a pra samastojnaść «Danieckaj Respubliki». Nastupny «refierendum» moža adbycca ŭžo praz tydzień. Na im budzie pytańnie dałučycca da Rasii ci być u składzie Ukrainy.
Ludzi na samaj spravie chadzili na ŭčastki, ale ličby tych, chto pryniaŭ udzieł u hałasavańni, mocna zavyšanyja.
Tyja, chto prychodziać na ŭčastki, hałasujuć u asnoŭnym «za», bo nadakučyŭ hety bardak.
— U čym bardak, kali ŭsie ŭstanovy pracujuć, a zarobki i piensii vypłačvajucca?
— Bardak ŭ tym, što luby pjany i abkurany marhinał pad vyhladam samaabarony moža pryjści da ciabie ŭ dom i zapatrabavać što zachoča.
Spynić mašynu i raźbić jaje prosta tak. Abo adabrać. Abo rasstralać, jak zdaryłasia ź siamjoj z Łuhanska. Bo niama nijakich admietnych znakaŭ u «sapraŭdnych revalucyjanieraŭ» i, skažam tak, bandytaŭ.
— Na vašu dumku, što dumajuć žychary Daniecka ab dałučeńni da Rasii?
— Asnoŭnaja masa pracujučaha nasielnictva adnaznačna suprać takoha dałučeńnia. Ludzi schilajucca da samastojnaści ŭ miežach Ukrainy ŭ vyhladzie aŭtanomii.
Naš rehijon — heta vuhalnaja i mietałurhičnaja pramysłovaści. Pobač — Rastoŭskaja vobłaść, padobnaja ŭ hetym płanie na nas, ale miascovyja vuhalnyja pradpryjemstvy daŭno abankrucilisia i začynilisia, bo ŭ Rasii — tanny vuhal, jaki zdabyvajuć z adkrytych radoviščaŭ. I mietał naš nie kankurentazdolny ŭ paraŭnańni z kitajskim.
Atrymlivajecca, što ŭsia danieckaja pradukcyja spažyvajecca va Ukrainie. Kali vyjdziem sa składu, naš rehijon ničoha dobraha nie čakaje — ni svajho charčavańnia, ni bienzinu. I nazirajučy dva miesiacy žyćcio ŭ Krymie, astudzilisia samyja haračyja hałovy…
— Jak miascovyja ludzi staviacca da prezidenckich vybaraŭ va Ukrainie, ci vyrašać hetyja vybary što-niebudź?
— Danieckija da vybaraŭ staviacca z nadziejaj. I jak pakazaŭ siońniašni refierendum — daremna.
Jość niebiaśpieka, što buduć stajać bajeviki z aŭtamatami i nikoha nie puściać na vybarčyja ŭčastki.
Siońnia «narodny hubiernatar» Hubaraŭ zajaviŭ, što vybary prezidenta nie adbuducca … Choć simpatyi ŭ danieckich, jak mnie zdajecca, schilajucca da Parašenki.
Dumaju, što vybary mnohaje mohuć vyrašyć.
Bo budzie lehitymna abrany prezident z paŭnamoctvami. Spadziajusia, heta budzie sapraŭdny mieniedžar, jaki viedaje, što treba rabić. A dziejničać treba terminova.
