Stužka ŭ Fejsbuku poŭnicca zachapleńniem, što paśla chakiejnych matčaŭ paŭsiul pa Miensku (ažno ŭ Šabanach!) čuvać kryki «Biełaruś!» i navat «Žyvie Biełaruś!» Kryčać, dyj ładna. Heta b zastałosia prostym žyćciovym nazirańniem, kali b nie supravadžałasia vykazvańniami i navat artykułami ŭ presie ŭ rečyščy «Takoha raniej nie było», «Ludzi stanoviacca nacyjaj», «V takije momienty my bolšie vsieho vspominajem, čto my biełorusy».

Ot tak, narešcie biełarusaŭ niešta abjadnała — ciapier my hatovyja ŭstupić u Eŭraźviaz… Chacia, našto nam toj Eŭraźviaz! — budujem ułasnuju biełaruskuju imperyju na hlebie chakiejnych kaštoŭnaściaŭ!

Nakolki ž my stali niepatrabavalnymi, kali zvyčajnuju radaść spartovych zaŭziataraŭ hatovyja ŭsprymać jak prajavu nacyjanalnaj jednaści. Nu tak, ludzi kryčać «Biełaruś». I što z hetaha vynikaje? Vy pahavarycie ź imi, spytajciesia, za kaho jany hałasavali na vybarach ci jak jany staviacca da ŭkrainskaj sytuacyi. Nie vyklučaju, što mocna rasčarujeciesia.

Pa telekanale STV pakazali siužet paśla matču, kali mužčyna ŭ biełaruskaj vyšyvancy kryčyć «Biełaruś!» i potym kaža karespandentu — «Dziakuj prezydentu, što jon usio heta pabudavaŭ. Tolki dziakujučy jamu ŭ nas taki čempijanat. Bie-ła-ruś, Bie-ła-ruś».

Dyk voś, adkryju vam adzin sakret: ludzi, jakija vystupajuć za demakratyju i ŭstupleńnie ŭ Eŭraźviaz — radujucca za Biełaruś, kali jany vyjhraje. Ale ludzi, jakija nienavidziać biełaruskuju movu i chočuć, kab Biełaruś ustupiła ŭ Rasieju — taksama radujucca za Biełaruś, kali jana vyjhraje.. Ludzi, jakija hatovyja «mačyć» apazycyju, nienavidziać «banderaŭcaŭ» i «Hiejropu» — taksama kryčać «Bie-ła-ruś!» i radujucca, kali jana vyjhraje.

Biełarusy nastolki roznyja ŭ svaich asnoŭnych padychodach da žyćcia i palityki, što nijakaja spartovaja pieramoha nijakim čynam ich nie zbližaje. My ŭžo pieramahali ŭ futboł u Halandyi, vyjhravali ŭ chakiej na Alimpijadzie ŭ švedaŭ i na čempijanacie śvietu ŭ rasiejcaŭ, Nieściarenka abhaniała ŭsich na Alimpijadzie na stometroŭcy, BATE pieramahała «Bavaryju», Domračava zdabyła try zołaty na apošniaj Alimpijadzie. Chto-niebudź moža mnie patłumačyć, jakija hramadzkija zruchi adbyvalisia ŭ hety momant ź biełaruskaj nacyjaj na fonie spartovych pieramoh? U čym kankretna prajaŭlałasia hetaja «nacyjanalnaja jednaść», «adčuvańnie supolnaha duchu»? U hramadztvie ŭzrastała padtrymka nacyjanalnaj kultury, niejkich biełaruskich kaštoŭnaściaŭ? Nie-a. Moža, biełarusy, adčuŭšy rost hodnaści ŭ vyniku spartovych pieramohaŭ, pačynali bolš zmahacca za svaje ŭłasnyja hramadzianskija, sacyjalnyja i palityčnyja pravy? Nie-a.

Pabudova nacyi – heta miljon paśladoŭnych krokaŭ, i sport – adzin ź ich, istotny, ale daloka nie samy vyrašalny (prosta jon najbolš hučny i prykmietny dla šyrokaj publiki)

Voś, darečy, Domračava pieramahała na Alimpijadzie ŭ Sočy ŭ lutym, a ŭ sakaviku było praviedziena čarhovaje sacyjalahičnaje apytańnie NISEPD, Pavodle jaho, kali ŭ śniežni za abjadnańnie Rasiei i Biełarusi prahałasavali b 23,9% apytanych, to ŭ sakaviku — 29,3% Heta tak spartovyja pieramohi ŭpłyvajuć na patryjatyzm i nacyjanalnuju jednaść?

Dy nijak jany nie ŭpłyvajuć. Para pierastać čakać ad sportu nacyjatvornaha cudu. Kali ja zaŭzieju za biełarusaŭ padčas matču razam ź niejkim čałaviekam, my radujemsia, abdymajemsia… ale ja nia maju nijakich iluzijaŭ. Ja razumieju, što matč skončycca, i my zastaniemsia pry svaich mierkavańniach pa ŭsich asnoŭnych žyćciovych pryncypach, my nia zblizilisia ni ŭ čym.

Heta jak u kinateatry, dzie dźvie hadziny «ŭsie jak adzin» hledačy pieražyvajuć za svajho ŭlubionaha hieroja. Kino zakančvajecca, i ŭsie viartajucca ŭ realnaje žyćcio, nie spadziejučysia na dapamohu Čałavieka-pavuka ŭ vyrašeńni svaich prablemaŭ. I na chakiej, jak na Supiermena, spadziavacca nia varta.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?