Adna z samych našumiełych temaŭ apošnich dzion — lidarstva Biełarusi pavodle dadzienych Suśvietnaj arhanizacyi achovy zdaroŭja pa spažyvańni ałkaholu — 17,5 litra na dušu nasielnictva ŭ pieraliku na čysty śpirt.

Zrešty, Ministerstva achovy zdaroŭja Biełarusi zapiarečyła, što ličba zavyšanaja, nazvaŭšy inšy pakazčyk — 11,14 litra. Navat kali tak, to i heta prykraje miesca ŭ pieršaj dvaccatcy! Adnak aficyjnaja statystyka ŭ našaj krainie nie ŭličvaje samarobnyja ałkaholnyja napoi i nielehalna ŭviezienyja ŭ Biełaruś.

Ruch «Za Svabodu» prapanuje šerah zachadaŭ pa deałkahalizacyi nasielnictva i antytytuniovyja miery — heta adzin z punktaŭ «Narodnaj prahramy», jaki tyčycca reformaŭ u śfiery achovy zdaroŭja. Nahadajem, «Narodnaja prahrama»- heta inicyjatyva Ruchu «Za Svabodu» pa vypracoŭcy kancepcyi pieraŭtvareńniaŭ u Biełarusi z dapamohaj ekśpiertnaha i šyrokaha hramadskaha abmierkavańnia nadzionnych pytańniaŭ raźvićcia krainy.

Siarod mieraŭ pa źnižeńni spažyvańnia ałkaholu i tytuniu prapanujucca:

— Značnaje pavieličeńnie akcyzaŭ na ałkahol i cyharety (naprykład, košt butelki harełki musić być roŭny nie mieniej za minimalny dzionny zarobak);

— Zabarona prodažu piva i mocnaha ałkaholu ad 22:00 viečara da 10:00 ranicy;

— Vynas prodažu cyharet i ałkaholu ŭ śpiecyjalizavanyja kramy i šapiki;

— Poŭnaja zabarona rekłamy cyharet, piva i mocnaha ałkaholu ŭ ŚMI i na biłbordach, a taksama handlovych marak vytvorcaŭ cyharet i ałkaholu;

— Pavieličeńnie ŭzrostavaha cenzu na zabaronu prodažu cyharet, piva i mocnaha ałkaholu asobam da 21 hoda;

— Zabarona vyrabnictva i prodažu pładova-jahadnych vin («čarniła») na ŭsioj terytoryi Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?