Biezvynikovymi dla Ukrainy nazvaŭ učarašnija pieramovy ŭ Minsku ŭkrainski premjer-ministr Arsień Jacaniuk na pasiadžeńni Kabinieta ministraŭ u Kijevie 27 žniŭnia.

Jak paviedamlaje RBK-Ukraina, Jacaniuk adznačyŭ: Ukraina nie mieła asablivych čakańniaŭ ad učarašnich pieramoŭ z Rasijaj, ale hety šlach usio adno treba prajści. 

«Dla Ukrainy jość try asnoŭnyja vykliki: vajna, valutna-abmienny kurs i enierhietyka. Učora adbylisia trochbakovyja kansultacyi, i adzinaja kraina, jakaja nie viedaje, što hetaja vajna raźviazanaja Rasijskaj Fiederacyjaj, — heta Rasija. Jak minimum, takuju vysnovu možna zrabić sa słoŭ prezidenta Pucina», — skazaŭ Jacaniuk.

Vyrašyć pieršy z hetych vyklikaŭ (vajenny kanflikt) možna tolki adnym sposabam: Ukraina adnaŭlaje kantrol nad miažoj, Rasija spyniaje pastaŭki zbroi, a ABSIE kantraluje hety praces, padkreśliŭ kiraŭnik ukrainskaha ŭrada. 

Nahadajem, paśla dvuchbakovych pieramoŭ z Uładzimiram Pucinym, jakija prajšli 26 žniŭnia ŭ Minsku pozna viečaram u miežach samitu Mytny sajuz — Ukraina — Jeŭrasajuz, ukrainski prezident Piotr Parašenka zajaviŭ: pieramovy byli «vielmi ciažkimi i składanymi». 

«Byli vielmi ciažkija i składanyja pieramovy. Dasiahnutaja damoŭlenaść, što my aktyvizujem dziejnaść trochbakovaj kantaktnaj hrupy (z ABSIE). Damovilisia, što nieadkładna pačnucca kansultacyi pahraničnikaŭ. Načalniki hienštaboŭ taksama raspačnuć kantakty», — paviedamiŭ Parašenka. «Na bazie mirnaha płana budzie padrychtavanaja darožnaja karta, kab jak maha chutčej vyjści na režym spynieńnia ahniu», — dadaŭ prezident Ukrainy. Jon abmiežavaŭsia tolki zajavaj, admoviŭšysia adkazvać na pytańni. 

Pucin paśla sustrečy zajaviŭ, što ŭmovy spynieńnia ahniu va Ukrainie z Parašenkam pradmietna nie abmiarkoŭvalisia, bo heta ŭnutranaja sprava Ukrainy. «My možam tolki spryjać tamu, kab stvaryć stanovišča davieru padčas hetaha mahčymaha i, na moj pohlad, vielmi nieabchodnaha pieramoŭnaha pracesu. Voś my pra heta havaryli: dzie heta mahčyma, što Rasija mahła b zrabić dla taho, kab zabiaśpiečyć hety praces. A niejkich umoŭ my nie vystaŭlali i nie možam hetaha rabić, ja liču, nie majem na heta nijakaha prava», — skazaŭ Pucin.

Jon paviedamiŭ, što havorka išła taksama pra mahčymaść i nieabchodnaść akazańnia humanitarnaj dapamohi i Daniecku, i Łuhansku. Dasiahnutaja damoŭlenaść ab tym, jak baki buduć uzajemadziejničać u hetym kirunku. 

«Havaryli pra ŭzajemadziejańnie ŭ budučyni ŭ roznych siektarach. U nas hazavaje pytańnie ŭ tupiku. Heta ž nastolki surjozna i dla nas, i dla Ukrainy, i dla našych jeŭrapiejskich partnioraŭ. Sakret nievialiki: «Hazprom» prapłaciŭ avans za tranzit našaha hazu ŭ Jeŭropu. NAK Ukrainy hety avans viarnuŭ. Praktyčna apynuŭsia padviešanym tranzit našaha hazu jeŭrapiejskim spažyŭcam. Što dalej voś z hetym budzie? Heta pytańnie, jakoje čakaje svajho karpatlivaha daśledčyka ŭ asobie našych partnioraŭ — i jeŭrapiejskich, i ŭkrainskich», — adznačyŭ Pucin. 

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?