Prapanova ab budaŭnictvie abjaznoj darohi, jakaja raźmieścicca na niekatoraj adlehłaści ad stalicy, naradziłasia bolš za čatyry hady tamu. Miełasia na ŭvazie, što metazhodna puścić tranzitny, u pieršuju čarhu hruzavy, transpart za miežami horada, kab razhruzić stalicu.
Nieŭzabavie Alaksandr Łukašenka padpisaŭ Ukaz ab budaŭnictvie takoj darohi. Pavodle hetaha dakumienta mierkavałasia, što ŭžo ŭ 2014-m źjavicca pieršy z dvuch novych učastkaŭ mahistrali. Adnak budaŭnictva išło vielmi pavolna z-za niedachopu finansavańnia. Situacyja źmianiłasia ŭ pačatku hetaha hoda, kali Łukašenka ŭziaŭ jaje na asabisty kantrol.
Jak projdzie kalco
Usiu mahistral možna ŭmoŭna padzialić na dźvie častki. Pieršaja, jakuju treba budzie pabudavać, heta biez małoha 90 km šlachu. Druhaja — isnujučaja, kudy ŭvachodziać 48-kiłamietrovy ŭčastak trasy M1 (Brest — Maskva), 10-kiłamietrovy adrezak darohi M2 (Minsk — Nacyjanalny aeraport Minsk) i aŭtadaroha R80 (Słabada — Papiernia) praciahłaściu 14 km.
Novuju častku, jakaja projdzie na paŭnočny zachad, a zatym i na paŭdniovy zachad ad stalicy, treba budzie pabudavać u dva etapy. Na pieršym pavinna źjavicca daroha praciahłaściu 46,1 km ad trasy M3 (Minsk — Viciebsk) u rajonie Astrašyckaha Haradka da aŭtadarohi M6/E28 (Minsk — Hrodna — miaža Polščy) u rajonie Aksakaŭščyny. Na druhim etapie namiačajecca padoŭžyć trasu ad Aksakaŭščyny da mahistrali M1 (Brest — Minsk — miaža Rasii) u rajonie vioski Suchadoł. Heta adrezak daŭžynioj bolš za 40 km.
Kali ŭtvorycca poŭnaje kalco, čarha dojdzie da rekanstrukcyi isnujučaj častki, jakaja składajecca ź niekalkich roznych tras. Pierš za ŭsio daviadziecca pašyryć darohu R80 Słabada — Papiernia, jakaja na karystanym učastku maje ŭsiaho dźvie pałasy.
Trasa ŭzroŭniu «M»
Jak kažuć prajekciroŭščyki, śpiecyjalisty HP «Biełhipradar», šyrynia druhoj kalcavoj amal 23 m: pa dźvie pałasy ŭ kožnym napramku. Plus raździalalnaja pałasa, na jakoj amal na ŭsim praciahu ŭstalujuć mietaličnuju aharodžu. Plus umacavanyja abočyny. Prajekt robicca tak, kab pry nieabchodnaści mahistral možna było pašyryć da šaści pałos. Miarkujecca, što ŭ pierśpiektyvie na niekatorych učastkach hetaj trasy źjavicca aśviatleńnie. A tam, dzie daroha maksimalna nabližana da zabudovy, ustalujuć šumaachoŭnyja ekrany.
Prajekciroŭščyki skrupulozna pradumvali trasiroŭku, kab maksimalna addalić patok mašyn ad nasielenych punktaŭ, sadavodčych tavarystvaŭ i paźbiehnuć znosu budynkaŭ. Akramia taho, trasa sprajektavanaja tak, kab nie zakranać miažy pryrodnych terytoryj pad achovaj i miescaŭ, jakija źjaŭlajucca histaryčnaj kaštoŭnaściu. Pakolki płanujecca, što dazvolenaja chutkaść na mahistrali budzie paradku 120 km/h, asablivy kłopat — biaśpieka ruchu. Tamu pry skryžavańni kalcavoj ź inšymi darohami pabudujuć raźviazki ŭ roznych uzroŭniach, a dla piešachodaŭ u adnym miescy navat zrobiać padziemny tunel. Tolki na pieršym etapie na 46 kiłamietrach ŭźviaduć 24 roznyja zbudavańni.
Pieršapačatkova mierkavałasia, što kalcavaja budzie asfaltabietonnaj. Ale ŭ kančatkovym varyjancie vyrašana, što jaje zrobiać z cemientabietonnym pakryćciom. Heta dazvolić vykarystać vyklučna ajčynnyja budmateryjały, što adabjecca na košcie. Ale jakaść pry hetym nie pacierpić. Darožniki kažuć, što padobnaje pakryćcio bolš daŭhaviečnaje, čym asfalt, jano vytrymlivaje jašče bolšyja nahruzki. Da taho ž sučasnyja materyjały, technika, novyja technałohii dazvalajuć rabić bietonku zusim inšaha ŭzroŭniu ŭ paraŭnańni z tymi, jakija budavali raniej.
Pieršy etap
Takim čynam, budaŭnictva kalcavoj ź viasny biahučaha hoda pajšło intensiŭna. Pieršy etap uźviadzieńnia darohi daŭžynioj 46,1 km raźbity na piać čerhaŭ. Ciapier, jak raspavioŭ načalnik upraŭleńnia padradnych rabot RUP «Minskaŭtadar-Centr» Andrej Lis, na pieršych troch čerhach (adrezak daŭžynioj 28 km) idzie pierakładka kamunikacyj, budaŭnictva štučnych zbudavańniaŭ (puciepravodaŭ i raźviazak) i, kažučy movaj prafiesijanałaŭ, uładkoŭvańnie darožnaha adzieńnia — nižniaha płasta ź piasčana-hravijnaj sumiesi. Miescami idzie zalivańnie bietonnaha padmurka i vierchniaha płasta darožnaha pakryćcia. Na 4-j i 5-j čerhach pakul viaducca padrychtoŭčyja pracy: rasčystka pałasy advodu ziamli ad kustoŭ i dreŭ, źniaćcie ŭradlivaha płasta hleby.
Hety etap płanujecca skončyć da 1 studzienia 2016 hoda. Praz hod pavinien być vykanany i druhi etap — pabudavana jašče bolš za 40 km darohi da trasy M1 (Brest — Minsk — miaža Rasii).
«Prajektavańnie i budaŭnictva mahistrali idzie paralelna, — udakładniŭ Andrej Lis. — Nie vyklučana, što ŭ nastupnym hodzie raboty pojduć adnačasova i na druhim etapie».
Jak skazaŭ namieśnik premjer-ministra respubliki Anatol Kalinin, pabyvaŭšy niadaŭna na budaŭnictvie druhoj kalcavoj, kab novaja MKAD stała pryvabnaj dla tranzitnych pieravozčykaŭ i našych hramadzian, uzdoŭž jaje pavinny źjavicca łahistyčnyja centry, prypynačnyja punkty, abjekty prydarožnaha servisu. Tady kalcavaja nadaść ekanomicy rajona dadatkovy impuls. Tak što pabudavać darohu — heta pieršaja zadača. Druhaja — stvaryć na joj infrastrukturu, kab abjekt zapracavaŭ z poŭnaj addačaj.
***
Siońnia na budaŭnictvie druhoj kalcavoj zadziejničany 301 samazvał, 167 adzinak darožna-budaŭničaj techniki, 429 čałaviek, u tym liku nie tolki darožnych rabočych, ale i kiroŭcaŭ, inžynierna-techničny piersanał.
Finansuje budaŭnictva Bank raźvićcia Respubliki Biełaruś, jaki vydzieliŭ 400 młrd rubloŭ. Jašče 300 młrd pradastaŭlena ź dziaržaŭnaha metavaha biudžetnaha fondu nacyjanalnaha raźvićcia.
