Ciapierašni hod Asambleja dziełavych kołaŭ Respubliki Biełaruś abviaściła hodam frančajzinhu ŭ našaj krainie.
U suviazi z hetym, 14 listapada ŭ Minsku projdzie mižnarodnaja vystava franšyz FRANCHISE HUB EXPO 2014, jakaja startuje 11 listapada ŭ Vilni, a 12 listapada projdzie ŭ Ryzie. Na dumku arhanizataraŭ, hetaje mierapryjemstva stanie samaj maštabnaj kanfierencyjaj i vystavaj franšyz u historyi Biełarusi.
Vystava pradastavić biełarusam unikalny šaniec paznajomicca i abmierkavać mahčymaści supracoŭnictva z pradstaŭnikami mižnarodnych franšyz. Padčas kanfierencyi naviedvalniki buduć mieć mahčymaść aznajomicca z praktyčnym vopytam i biźnies-idejami viadomych ekśpiertaŭ u śfiery frančajzinhu.
Na vystavie buduć pradstaŭlenyja zvyš za 20 franšyz z krain, jakija šukajuć partnioraŭ u Biełarusi. Siarod ich niamała viadomych brendaŭ ź Litvy: ahienctva nieruchomaści «Capital», sietki piceryj i restaranaŭ «Čili Pica» i «Charlie pizza», kramy spartyŭnaj adziežy «Audimas» i inšyja.
Jak pieradaje partał Respublikanskaj kanfiederacyi pradprymalnictva, adziny brend ź Biełarusi, jaki budzie pradstaŭleny na «Hub Franchise Expo 2014», — heta sietki piceryj «Pizza Smile».
Na vystavie buduć taksama pradstaŭlenyja franšyzy z Rasii, Vialikabrytanii, Ispanii, Kanady, ZŠA, Ukrainy i inšych krain. Naviedvalniki mohuć pahutaryć z pradstaŭnikami franšyzy aŭtamatyčnych pralniaŭ «Speed Queen», burhiernych «Steak'n'Shake» i «Burger Club», zakusačnych «Subway», kaviarniaŭ «Baskin Robbins» i inšych viadomych brendaŭ.
Frančajzinh u Biełarusi stanovicca ŭsio bolš papularnym biznes-instrumientam. Na dumku ekśpiertaŭ, miascovamu pradprymalniku moža spatrebicca ŭsiaho $5-8 tys. ahulnych układańniaŭ, kab atrymać hatovy biznes z usimi napracoŭkami i ŭžo viadomym na rynku imiem. Hetaja suma moža vahacca ŭ zaležnaści ad kankretnaha prajekta. Samyja darahija franšyzy ŭ biełaruskaj praktycy pieraadolvali płanku ŭ $300 tys.
Pačynajučy z 2006 hoda, było zaklučana kala 140 damovaŭ pa frančajzinhu ŭ Biełarusi. U 2013 hodzie było zaklučana 9 damovaŭ, a ŭžo na krasavik 2014 — 7 damovaŭ pa raspracoŭcy franšyzy.
