Biełaruskija mabilnyja raspracoŭščyki Apalon stali padraździaleńniem amierykanskaj internet-kampanii InterActiveCorp (IAC), paviedamlajecca ŭ pres-relizie IAC. Suma ŭhody nie nazyvajecca.
Pakupku Apalon ździejśniła kampanija Mindspark, što źjaŭlajecca dziejnym biznesam IAC.
«Siońniašnija naviny zaćviardžajuć fokus kamandy Apalon na raspracoŭku pryhožych prahram, jakija našyja klijenty vykarystoŭvajuć štodzień», — zajaviŭ suzasnavalnik Apalon Piotr Skaromny. «Mindspark i Apalon padzialajuć pohlad na stvareńnie šyrokaha śpiektru najlepšych u svaim kłasie prahram dla raspaŭsiudu pa ŭsich płatformach i rehijonach».
Štat Apalon składajecca prykładna sa sta čałaviek.
Kampanija źjaŭlajecca rezidentam Parka vysokich technałohij. Pavodle acenak ekśpiertaŭ, apytanych prajektam «Pro biźnies.», pakupka Apalon mahła kaštavać amierykancam 80—100 młn dalaraŭ. Kiravać Apalon paśla kupli praciahnuć jaje zasnavalniki.
Apalon była zasnavanaja ŭ 2007 hodzie jak padraździaleńnie raspacoŭščyka veb-prahram. Ź ciaham času kampanija pieraklučyłasia na raspracoŭku prahram dla iOS I Android. Niekatoryja prahramy kampanii nabyli nadzvyčajnuju papularnaść. Siarod ich nabor dla ŭpryhožvańnia rabočaha stała iOS Pimp My Screen, prahnoz nadvorja Weather Live, budzilnik My Alarm Clock, natatnik Notepad+. Sumarna ŭ prahram Apalon naličvajecca bolš za 200 miljonaŭ ustalovak i kala 20 miljonaŭ aktyŭnych karystalnikaŭ štomiesiac. Kampanija nie raz uvachodziła ŭ suśvietny top-10 pa kolkaści zahruzak prahram dla iOS.
IAC — mižnarodnaja internet-kampanija sa štab-kvateraj u Ńju-Jorku. Siarod jaje 150 brendaŭ takija kampanii jak Vimeo, Ask.fm, About.com, Dictionary.com, The Daily Beast. Vyručka kampanii za 2013 hod pieravymiła 3 młrd dalaraŭ, a čysty prybytak skłaŭ 285,8 młn dalaraŭ.
