Kiraŭnik dziaržavy admoviŭ u pamiłavańni asudžanamu da śmiarotnaha pakarańnia 26-hadovamu hamielčuku Alaksandru Hrunovu.
Jak paviedamiŭ advakat asudžanaha Siarhiej Krasnoŭ, sprava viarnułasia ŭ Homielski abłasny sud z paznakaj, što Hrunovu admoŭlena ŭ pamiłavańni, i ŭsie pracesualnyja dziejańni pa abskardžańni śmiarotnaha prysudu vykarystanyja. Pryčyna admovy ŭ takich vypadkach nie tłumačycca, rastłumačyŭ advakat.
«Miarkujučy pa ŭsim, prysud u vykanańnie jašče nie pryviedzieny, adpaviednych dakumientaŭ pakul nie pastupała», - dadaŭ Krasnoŭ.
Alaksandr Hrunoŭ pryznany vinavatym u zabojcu homielskaj studentki Natalli Jemieljančykavaj. Dziaŭčyna zahinuła ŭ vieraśni 2012 hoda - joj było naniesiena bolš za 100 nažavych ranieńniaŭ. Heta zabojstva Hrunoŭ ździejśniŭ praz hod paśla adbyćcia pakarańnia za žorstkaje źbićcio sužyciela svajoj maci, u vyniku jakoha toj skanaŭ.
Pieršy śmiarotny prysud Hrunovu Homielski abłasny sud vynies u červieni 2013 hoda, adnak praz čatyry miesiacy Viarchoŭny sud Biełarusi admianiŭ prysud i nakiravaŭ spravu na novy sudovy razhlad u sud pieršaj instancyi. U śniežni 2013 Homielski abłasny sud paŭtorna vynies śmiarotny prysud Hrunovu. U krasaviku hetaha hoda Viarchoŭny sud pakinuŭ prysud bieź źmieny.
Biełaruś zastajecca adzinaj u Jeŭropie i na postsavieckaj prastory krainaj, dzie vynosiacca i pryvodziacca ŭ vykanańnie śmiarotnyja prysudy. Tak, tolki z 1 lipienia 2013 pa 30 červienia 2014-ha byli vyniesienyja čatyry śmiarotnyja prysudy. Dva ź ich — pryviedzieny ŭ vykanańnie: pakaranyja Ryhor Juzepčuk 1969 hoda naradžeńnia, prysudžany da vyšejšaj miery pakarańnia za zabojstva sukamiernika, i Pavieł Sialun 1990 hoda naradžeńnia, asudžany na śmierć za zabojstva dvuch čałaviek.
