Kampanija Google dała Biełarusi dostup da anłajn-servisa Play Music, jaki dazvalaje kuplać i lehalna słuchać bolš za 20 miljonaŭ piesień na kampjuterach i smartfonach.
Pieśni ŭ Play Music možna słuchać anłajn albo zapampoŭvać praz admysłovuju prahramu Play Music dla prasłuchoŭvańnia bieź internetu. Servis umieje padkazvać słuchaču cikavyja treki, hruntujučysia na jaho hustach, i dazvalaje stvarać «radyjostancyi» ź piesień, padobnych da abranaj kampazicyi.
Usim karystalnikam dajecca 30 dzion biaspłatnaha dostupu da ŭsich piesień na servisie. Paśla prapanujecca aformić padpisku, jakaja kaštuje 3,99 dalary na miesiac (paźniej źjaviacca ceny ŭ biełaruskich rublach) albo kuplać pieśni i albomy za asobnuju płatu. Pieśnia kaštuje ad 10 centaŭ, albom — niekalki dalaraŭ.
Kankurenty Google Music, iTunes ad Apple i Xbox Music ad Microsoft, utrymlivajuć adpaviedna 37 i 38 młn kampazicyj.
Pieršy dastupny biełarusam sa śniežnia 2012 hoda, druhi ŭsio jašče nie dastupny ni Biełarusi, ni susiednim krainam. Na iTunes pieśni kaštujuć u siaredniem daražej, niž u Play Music: ad 70 centaŭ da 1,3 dalara. Rasijski siervis «Jandeks.Muzyka» ŭtrymlivaje 17 młn trekaŭ (jak rasijskich, tak i zamiežnych vykanaŭcaŭ), dastupnych dla biaspłatnaha lehalnaha prasłuchoŭvańnia anłajn.
Letam 2014 hoda Biełaruś atrymała dostup da inšaha servisa Google — Play Movies, jaki dazvalaje kuplać albo arandavać filmy i sieryjały.
Na sakavik 2014 hoda kala 61% telefonaŭ biełarusaŭ źjaŭlalisia smartfonami. Kala 90% rynku smartfonaŭ Biełarusi ŭ hrašovym vyražeńni naležyć smartfonam na apieracyjnaj sistemie Android.
