Da 150-hodździa Paŭstańnia 1863-1864 hadoŭ riežysior Pavieł Doŭnar padrychtavaŭ dakumientalnuju stužku «Šlacham paŭstancaŭ». Udzieł u filmie ŭziali viadomyja piśmieńniki i historyki Uładzimir Arłoŭ, Adam Maldzis, Aleś Smalančuk, Aleś Kraŭcevič, Aleś Radziuk, a taksama śviatar Leanid Akałovič i mastak Aleś Maračkin. 

Publičnaja premjera stužki adbyvajecca ŭ «Art-siadzibie» adnačasova z prezientacyjaj na biełaruskim partale TUT.BY.

Režysior filma Pavieł Doŭnar zaznačaje, što ideja stvareńnia filma źjaviłasia ŭžo daŭno, ale ciapier hetaja stužka nadzvyčaj aktualnaja:

- Mnie było vielmi cikava praanalizavć hetuju źjavu 150-hadovaj daŭniny. Tady adbyłasia hetaja ŭnikalnaja dla našaj ziamli padzieja i vielmi zajmalna, što praz taki doŭhi čas niekatoryja akaličnaści toj historyi aktualnyja i siońnia. Tym bolš istotna, što 2013-14 hady heta vialiki jubilej Paŭstańnia, tamu stužka maje takoje simvaličnaje značeńnie dla nas, jak dla naščadkaŭ hierojaŭ.

Muzyka Vinsent, aŭtar muzyčnaha saundtreku da filma padkreślivaje važnaść Paŭstańnia dla siońniašnich biełarusaŭ, u pryvatnaści, dla moładzi:

- Biezumoŭna, heta taja historyja, jakaja lažyć u našych karaniach. Niahledziačy na dramatyzm Paŭstańnia, heta vielmi pryhožaja i natchnialnaja padzieja dla biełarusaŭ. Ciešusia, što mnie vypaŭ honar napisać saundtrek da filma. Pieśnia nazyvajecca «Kaho lubiš?». Častka jaje zasnavanaja na tekście «Lista z-pad šybienicy» Kalinoŭskaha. Taksama ja ŭžyŭ viadomuju lehiendu pra parol: Kaho lubiš? – Lublu Biełaruś! – To ŭzajemna!

U filmie pieradusim uzdymajucca pytańni, što Paŭstańnie značyć dla Biełarusi, kim byli paŭstancy i kamu jany nie dajuć spakoju siońnia. Peŭnaja častka filmu apaviadaje pra žyćcio i dziejnaść lidera Paŭstańnia Kastusia Kalinoŭskaha, uzhadvajecca taksama ramantyčnaja suviaź Kastusia z Maryjaj Jamant. Film uzdymaje i dosyć addalenyja ad Biełarusi pytańni. Miž inšym, jakim čynam Paŭstańnie paŭpłyvała na hramadzianskuju vajnu ŭ ZŠA.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?