Kanduktarka tralejbusnaha parka ŭ Mahilovie vyrablała doma kvitki na adnu pajezdku ŭ tralejbusie i pradavała ich pasažyram. Pra heta paviedamiŭ načalnik ABEZ Leninskaha RAUS Mahilova Mikałaj Staradubcaŭ.
Apieratyŭnaja infarmacyja ab tym, što adzin z kanduktaraŭ Mahiloŭskaha pradpryjemstva «Harelektratranspart» zbyvaje pasažyram padroblenyja kvitki na adnu pajezdku ŭ tralejbusie, pastupiła supracoŭnikam ABEZ Leninskaha RAUS. U chodzie apieratyŭna-vyšukovych mierapryjemstvaŭ milicyjanty vyjavili, što akramia 50-hadovaj žycharki Mahilova padroblenyja kvitki ŭ tralejbusach maršrutaŭ №2 i №4 pradavali i dźvie jaje znajomyja, taksama kanduktarki. Padčas ahladaŭ pa miescy žycharstva ŭ ich kanfiskavali 312 padroblenych kvitkoŭ, kampjutarnuju techniku i ŭpakoŭku hazietnaj papiery.
Pa słovach Mikałaja Staradubcava, padroblenyja kvitki byli vielmi padobnyja na sapraŭdnyja. Kanduktarka vyrablała ich z dapamohaj kalarovaj drukarki, razrazała i ŭpieramiešku z sapraŭdnymi kvitkami ŭklejvała ŭsio ŭ katušku z sapraŭdnymi kvitkami. Z červienia pa žniŭni 2014 kanduktarki zbyli pasažyram 1368 padroblenych kvitkoŭ. Paśla ekśpiertyzy, praviedzienaj supracoŭnikami ŭpraŭleńnia Dziaržaŭnaha kamiteta sudovych ekśpiertyz Respubliki Biełaruś pa Mahiloŭskaj vobłaści, z ulikam sumy škody, naniesienaj pradpryjemstvu, ich dziejańni kvalifikavanyja jak vyrab abo zbyt kvitkoŭ ci inšych dakumientaŭ na prajezd pasažyraŭ.
U dačynieńni da kanduktarak składzienyja administracyjnyja pratakoły pa art. 11.33 KaAP Respubliki Biełaruś. Materyjały pieradadzienyja ŭ sud Leninskaha rajona h. Mahilova. Dadzienaje pravaparušeńnie praduhledžvaje štraf u pamiery ad dziesiaci da dvaccaci bazavych vieličyń (adna bazavaja ciapier składaje Br150 tys.).
