Hrupa biełaruskich apazicyjanieraŭ 5 listapada ŭ Minsku sustrełasia z načalnikam rehijanalnaha padraździaleńnia Dziarždepartamienta ZŠA pa Ukrainie, Małdovie i Biełarusi Alaksandram Kasanaf, paviedamiŭ lidar ruchu «Za Svabodu» Alaksandr Milinkievič.
Pavodle jaho słoŭ, na sustrečy prysutničali prykładna 15 pradstaŭnikoŭ asnoŭnych apazicyjnych palityčnych struktur, u tym liku staršynia Abjadnanaj hramadzianskaj partyi Anatol Labiedźka, lidar kampanii «Havary praŭdu» Uładzimir Niaklajeŭ, eks-staršynia Viarchoŭnaha Savieta Biełarusi Stanisłaŭ Šuškievič i inšyja.
«Sustreča była vielmi važnaja, tamu što ŭ Biełaruś pryjechaŭ vysokaha ŭzroŭniu dypłamat ź Dziaržaŭnaha departamienta ZŠA. Heta čałaviek vielmi infarmavany, nam važna było vykazać fakty, a nie emocyi», — paviedamiŭ Milinkievič.
Asnoŭnym pytańniem abmierkavańnia na sustrečy byli šancy na jeŭrapiejskuju budučyniu krain Uschodniaha partniorstva, zaznačyŭ Milinkievič. «Viadoma, asnoŭnyja padziei zaraz adbyvajucca va Ukrainie, ale treba razhladać adnačasova i ŭsie krainy Uschodniaha partniorstva, tamu što ŭ žorstkaj kanfrantacyi Rasii z Ukrainaj siońnia vyrašajecca los usiaho rehijonu», — skazaŭ jon.
Pavodle słoŭ Milinkieviča, u ZŠA «cudoŭna ŭśviedamlajuć niebiaśpieku vajny, jakaja tam razharajecca, što heta nie tolki kanflikt rasijska-ŭkrainski, ale i cyvilizacyjny». «Tamu važna padtrymać niezaležnaść šaści krain. ZŠA i ES razumiejuć, što vielmi važna pracavać jak z kožnaj krainaj indyvidualna, hetak i z usimi razam, kab u ich było bolš suvierenitetu, reform i samastojnaści», — skazaŭ palityk.
Udzielniki sustrečy, paviedamiŭ Milinkievič, taksama havaryli ab pravach čałavieka i palitźniavolenych. «Siońnia niezaležnaść — heta asnoŭnaja kaštoŭnaść, jakoj pahražajuć u našym rehijonie. Ale razam z tym, kali Zachad pierastanie pamiatać, što ŭ turmie siadziać palitźniavolenyja, heta budzie ŭdar pa tym, što my robim usie hetyja hady. My havorym, što Jeŭropa abjadnałasia na kaštoŭnaściach, i ŭ Biełarusi hetyja kaštoŭnaści nivielujucca. Tamu nam važna, kab dyjałoh, jaki viadzie ZŠA, byŭ adkrytym i šyrokim. Jaho možna vieści nie tolki z hramadstvam, ale i z uładami, ale hety dyjałoh taksama pavinien być krytyčnym i abumoŭlenym», — miarkuje jon.
Milinkievič zaznačyŭ, što Zachad «drenna hatovy da cyničnaj vajny, jakuju viadzie Rasija». «Na Zachadzie pryvykli bolšaść pytańniaŭ vyrašać dypłamatyčna, mirna, vidać, Rasija hetaha nie choča. Razam z tym Zachad nie choča raźviazvać vajnu z Rasijaj, tamu što jana moža stać jadziernaj», — padkreśliŭ jon.
«My havaryli, što pavinna być stratehija ŭ dačynieńni da šaści krain Uschodniaha partniorstva, — skazaŭ Milinkievič. — Hałoŭnaja prablema postsavieckaj prastory — apošniaja stupień savietyzacyi ludziej. Prablema viartańnia ŭ jeŭrapiejskuju siamju — heta pracesy. Niahledziačy navat na vajennyja kanflikty, pavinna być prahrama demakratyzacyi, jeŭrapieizacyi i desavietyzacyi našych krain».
