Biełaruskaja čyhunka adkryła prodaž biletaŭ na ciahniki ŭ napramku Nacyjanalnaha aeraporta Minsk, paviedamili ŭ pres-centry BČ.
Bilety na ciahniki, što ažyćciaŭlajuć pieravozki ad stancyi Minsk-Pasažyrski da prypynačnaha punkta Nacyjanalny aeraport Minsk, možna nabyć va ŭsich rehijonach Biełarusi ŭ punktach afarmleńnia prajaznych dakumientaŭ BČ, uklučajučy płaciežna-daviedačnyja terminały samaabsłuhoŭvańnia. Dva takija terminały byli ŭstanoŭleny na druhoj płatformie stancyi Minsk-Pasažyrski, ź jakoj štodzień buduć adpraŭlacca ciahniki ŭ aeraport. Śpiecyjalisty adznačyli, što dla ŭsich terminałaŭ była raspracavana novaja viersija prahramnaha zabieśpiačeńnia i źmienieny interfiejs ekranaŭ, na jakich źjaviłasia knopka «U Nacyjanalny aeraport Minsk».
Prajaznyja dakumienty ŭ aeraport možna kupić za 10 sutak da adpraŭleńnia ciahnika. Akramia taho, u dzień adpraŭleńnia nabyć bilet mahčyma niepasredna ŭ ciahniku ŭ biletnych kasiraŭ abo praz płaciežnyja terminały samaabsłuhoŭvańnia, ustanoŭlenyja ŭ aeraporcie.
Košt adnoj pajezdki da aeraporta ad stancyi Minsk-Pasažyrski składzie Br25 tys., ad stancyi Smalavičy - Br14 600.
Jak paviedamlałasia, ruch pasažyrskich ciahnikoŭ pa maršrucie «Stancyja Minsk-Pasažyrski - Prypynačny punkt Nacyjanalny aeraport Minsk» BČ adkryje ŭ testavym režymie 7 listapada. U hety dzień sučasny trochvahonny dyziel-ciahnik zrobić u aeraport dva rejsy. Z 8 listapada pa novym maršrucie buduć štodzień kursiravać 5 par takich ciahnikoŭ. Pa maršrucie ruchu praduhledžany adzin prypynak u Smalavičach.
Prajezd ad prypynačnaha punkta Nacyjanalny aeraport Minsk niepasredna da aeraporta budzie ažyćciaŭlacca na aŭtobusie. Ahulny čas u darozie z ulikam pierasadki zojmie amal 70 chvilin, ź ich 55-56 chvilin prypadaje na prajezd čyhunkaj.
