Alaksandr Łukašenka niezadavoleny tempami raźvićcia Mahiloŭskaj vobłaści. Ab hetym jon zajaviŭ siońnia na naradzie, rašeńnie ab praviadzieńni jakoj jon pryniaŭ paśla pryjezdu ŭ Mahiloŭskuju vobłaść.
Alaksandr Łukašenka padkreśliŭ, što jaho chvaluje situacyja ŭ Mahiloŭskaj vobłaści i chacieŭ by pačuć ad kiraŭnictva rehijona, jakija pakazčyki demanstruje vobłaść z pačatku hoda. Jon adznačyŭ, što jamu pastupajuć tryvožnyja sihnały pa situacyi ŭ Mahiloŭskaj vobłaści, i heta infarmacyja paćviardžajecca ź niezaležnych krynic. «Tamu mianie nie moža nie chvalavać taja situacyja, što składvajecca ŭ Mahiloŭskaj vobłaści», — skazaŭ Alaksandr Łukašenka.
U jakaści prykładaŭ kiraŭnik dziaržavy pryvioŭ niekatoryja pakazčyki raboty rehijona. U pryvatnaści, za 9 miesiacaŭ biahučaha hoda abjom vyrablenaha vałavoha rehijanalnaha praduktu Mahiloŭskaj vobłaści skłaŭ Br39,3 trłn, abo ŭ supastaŭnych cenach 96,8 pracenta da ŭzroŭniu anałahičnaha pieryjadu minułaha hoda, vyrablena pramysłovaj pradukcyi amal na Br44 trłn (94,2 pracenta, pa respublicy — 101,2 pracenta da adpaviednaha pieryjadu minułaha hoda). Na 1 kastryčnika zapasy hatovaj pradukcyi na składach pramysłovych pradpryjemstvaŭ vobłaści ŭ faktyčnych cenach skłali Br3 trłn, abo 72 pracenty da siaredniamiesiačnaha abjomu vytvorčaści. Pavodle papiarednich danych, u studzieni-vieraśni arhanizacyjami vobłaści ekspartavana tavaraŭ na sumu $1,757 młrd. Da ŭzroŭniu anałahičnaha pieryjadu 2013 hoda ekspart tavaraŭ skłaŭ 94 pracenty, biez uliku nafty i naftapraduktaŭ. Prahnoz na studzień-vierasień 2014 hoda - amal 110 pracentaŭ. «Taksama pravał», — kanstatavaŭ Łukašenka.
Impart tavaraŭ za 9 miesiacaŭ 2014 hoda pa vobłaści skłaŭ $1,237 młrd i źmienšyŭsia na 10 pracentaŭ. Salda źniešniaha handlu tavarami skłałasia dadatnaje ŭ pamiery paŭmiljarda dołaraŭ. Kiraŭnik dziaržavy pryvioŭ niesuciašalnyja danyja i pa rabocie sielhasarhanizacyj, pramysłovych pradpryjemstvaŭ vobłaści.
«Ja skroź palcy nie mahu hladzieć na taki stan spraŭ u vobłaści, — padkreśliŭ Łukašenka. — Pavinny być kankretnyja vyniki. Kali ich niama, tady treba dumać, chto budzie davać hetyja vyniki».
