U šeści da Łošyckaha jara, dzie raźmieščany pamiatny znak u honar achviaraŭ stalinskich represij, biaruć udzieł prykładna piaćdziasiat čałaviek.
Šeście pačałosia ŭ 12.30 ad Pałaca kultury «Łošycki». Kałonu ŭznačalvaje kiraŭnictva Kansiervatyŭna-chryścijanskaj partyi — BNF, jakaja źjaŭlajecca arhanizataram akcyi. Udzielniki šeścia niasuć bieł-čyrvona-biełyja ściahi, raściažki z nadpisami «Dziady» i «Kansiervatyŭna-chryścijanskaja partyja — BNF». Pieryjadyčna skandzirujuć łozunh «Žyvie Biełaruś!». Demanstrantaŭ supravadžajuć kala dvuch dziasiatkaŭ ludziej u cyvilnym, dva milicejskija mikraaŭtobusy, mašyna DAI, viadziecca videazdymka.
Štohadovaje šeście da Łošyckaha jara, jak i šeście ŭ Kurapaty, prymierkavanaje da dnia pamiaci prodkaŭ «Dziady», jaki adznačajecca 2 listapada.
Pavodle źviestak historykaŭ, u 1930-ch hadach u Łošyckim jary znachodziłasia hetak zvanaja «Biełaja dača» — miesca raźmiaščeńnia śpieckamandy NKUS, kudy dastaŭlali aryštavanych achviaraŭ stalinskich represij. Tut ža ich rasstrelvali.
Šeście i mitynh sankcyjanavanyja Minharvykankamam.