Mark Michalski i Džozef Ros ź miedyčnaj škoły Jelskaha ŭniviersiteta (Kaniektykut, ZŠA) zrabili ahlad vykarystańnia «cudu techniki» ŭ siońniašniaj miedycynie.
Da prykładu, užo bolš za 10 hod u stamatałohii takim sposabam vyrablajuć pres-formy dla zubnych impłantataŭ.
Chirurhi napiaredadni składanych apieracyj robiać pieradapieracyjnyja madeli. Naprykład, možna zmadelavać pavodle vynikaŭ KT albo MRT trochmierny frahmient kostki, jakuju tre' budzie ŭvasobić padčas płastyčnaj apieracyi. Vierahodna, u niepasrednaj budučyni takim čynam ź bijapalimieru možna budzie vyrablać i zamienu stračanaj praz chvarobu ci traŭmu kostki.
Sučasnyja technałohii dazvalajuć zmadelavać indyvidualnuju bijasumiaščalnuju palimiernuju šynu dla dychalnych šlachoŭ. Kali niemaŭla chvoraje na bronchamalacyju, takaja šyna nie dazvalaje spadacca ścienkam bronchaŭ. A praz try hady hety pratez rassmokčacca.
3D-druk taksama byŭ vykarystany dziela stvareńnia pratezaŭ, jakija ciapier mohuć być raspracavanyja ŭ ličbavym vyhladzie i zalityja dla spampoŭki ŭ internet.
Tym nie mienš, adznačajuć daśledčyki, lekary i pacyjenty sutykajucca z prablemaj razumieńnia hetaj składanaj technałohii i nie zaŭsiody mohuć uzvažyć patencyjnuju karyść i vierahodnyja ryzyki ad niasłušnaj interpretacyi.
Leanard Marks, urołah univiersiteta Kalifornii ŭ Łos-Andželesie, bačyć mnostva mahčymaściaŭ dla vykarystańnia 3D-druku. «My zacikavilisia hetym, nazirajučy rakavyja puchliny prastaty na MRT i padčas apieracyi. Nakolki abjektyŭnuju karcinu daje MRT? My vykarystoŭvajem 3D-druk, kab zrabić madel prastaty i supastavić jaje z dadzienymi MRT i vydalenym orhanam, ź jakoha ŭžo možna atrymać adpaviedny šerah zrezaŭ. Ustanaŭleńnie suviazi pamiž realnaj karcinaj i dadzienymi MRT dazvalaje bolš abjektyŭna tłumačyć zdymki i robić našuju dapamohu chvorym ludziam bolš efiektyŭnaj na lubych stadyjach raku. Pryčym pryciahalnaść 3D-druku i ŭ paraŭnalna nievysokich cenach takich madelaŭ».
