Padčas izrailskaha avijaŭdaru 7 śniežnia byli źniščany schoviščy z rakietnymi kompleksami S-300 rasijskaj vytvorčaści, piša izrailskaje infarmacyjnaje ahienctva cursorinfo.co.il.
Źjaŭleńnie rasijskich ZRK S-300 mahło pryvieści da ciažkich strataŭ avijacyi Izraila ŭ vypadku patencyjnaha kanfliktu. Hetak, na ŭschodzie Ukrainy źjaŭleńnie navat mienš mahutnych zienitna-rakietnych kompleksaŭ u rukach rasijskich bajevikoŭ rezka abmiežavała mahčymaści ŭkrainskaj armii.
Vyniki apošniaj izrailskaj bambiožki.
Izrailskija vajskoŭcy admovilisia kamientavać paviedamleńni presy.
Sajt łondanskaj arabskaj haziety paviedamiŭ, što izrailcianie bambili mižnarodny aeraport Damaska i vajskovyja składy ŭ rajonie pasielišča Dzimas kala miažy ź Livanam.
Aficyjnyja siryjskija ŭłady zajavili, što bambiožka śviedčyć pra padtrymku Izrailem «teryrystaŭ» - to bok siryjskaj uzbrojenaj apazicyi.
ZRK S-300. U zaležnaści ad rakiety, moža źbivać celi na dalnaści da 150 km i na vyšyni da 27 km.
Rasija 8 śniežnia zajaviła pra svaju «hłubokuju zaniepakojenaść hetym niebiaśpiečnym raźvićciom padziejaŭ», a taksama što «užyvańnie siły ŭ miždziaržaŭnych adnosinach niedapuščalna».
Damask damoviŭsia pra kuplu čatyroch batarej S-300 (pa šeść puskavych kompleksaŭ) u Maskvy jašče ŭ 2010 hodzie. U mai 2013 hodu prezident Siryi Bašar Asad paviedamiŭ, što Siryja atrymała pieršuju partyju S-300, adnak potym prezident RF Uładzimir Pucin zajaviŭ, što kantrakt nie realizavany.
Prykładna za dzień da izrailskaha avijaŭdaru namieśnik ministra zamiežnych spraŭ RF Michaił Bahdanaŭ u Livanie sustreŭsia ź lidaram «Chiezbałły» šejcham Hasanam Nasrałoj, paviedamiŭ sajt izrailskaj haziety timesofisrael.com 7 śniežnia.
