Sioleta Biełaruś pavinna vypłacić pa ŭnutranych i źniešnich dziaržaŭnych abaviazacielstvach bolš za 4 młrd. dołaraŭ.
Pavodle infarmacyi BiełaPAN, pryblizna 3,1 młrd. dołaraŭ nieabchodna budzie pieraličyć u košt pahašeńnia i absłuhoŭvańnia źniešniaha dziaržaŭnaha doŭhu.
Najbolšy abjom źniešnich valutnych płaciažoŭ prypadaje na pahašeńnie i absłuhoŭvańnie dziarždoŭhu, jaki ŭtvaryŭsia ŭ suviazi z vypuskam Biełaruśsiu piacihadovych jeŭraablihacyj u 2010 hodzie. U košt pahašeńnia hetych abaviazacielstvaŭ kraina pavinna budzie vypłacić u 2015 hodzie amal 1,2 młrd. dołaraŭ.
Akramia taho, nieabchodna vypłacić 716,3 młn. dołaraŭ pa miždziaržaŭnych kredytach Rasii. Poruč z hetym zapłanavanyja vypłaty pa kredycie Antykryzisnaha fondu JeŭrAzES u 541,2 młn. dołaraŭ.
Pa kredytach Kitaja i Vieniesueły Biełaruś pavinna budzie vypłacić sioleta 380,4 młn. i 121,8 młn. dołaraŭ adpaviedna.
Na 2015 hod taksama prypadajuć vypłaty Biełarusi pa absłuhoŭvańni i pahašeńni ŭnutranaha valutnaha dziaržaŭnaha doŭhu, jakija składuć pryblizna 1 młrd. dołaraŭ.
Pavodle źviestak Ministerstva finansaŭ, na pahašeńnie źniešniaha dziarždoŭhu ŭ 2015 hodzie płanujecca nakiravać 1,9 młrd. dołaraŭ pastupleńniaŭ biudžetu ad vyvaznych pošlin na naftapradukty, jašče pryblizna 330 młn. dołaraŭ płanujecca adšukać na vypłaty pa dziarždoŭhu za košt źbirańnia pošlin ad ekspartu biełaruskaj nafty.
Akramia hetaha, dla vykanańnia abaviazacielstvaŭ pa źniešnim dziarždoŭhu ŭrad u 2015 hodzie maje namier raźmiaścić ablihacyi na 1 młrd. dołaraŭ na źniešnim rynku i zaniać prykładna 800 młn. dołaraŭ za košt unutranych ablihacyj.
Z ulikam pikavych vypłat pa źniešnim dziarždoŭhu, jakija pačalisia ŭ 2013 hodzie, Nacyjanalny bank u asnoŭnych kirunkach hrašova-kredytnaj palityki na heta hod zapłanavaŭ nulavy rost zołatavalutnych reziervaŭ.
U 2013 hodzie Biełaruś nakiravała na pahašeńnie źniešniaha dziarždoŭhu 2 młrd. dołaraŭ, u studzieni—listapadzie 2014-ha — 4,23 młrd. dołaraŭ.
