U čaćvier, 8 studzienia (14:30), u sudzie Pieršamajskaha rajona Minska adbudziecca razhlad skarhi pravaabaroncy Aleny Tankačovaj na rašeńnie milicyi na jaje vysyłku z krainy.

Nahadajem, 5 listapada 2014-ha Pieršamajski RUUS pradpisaŭ Tankačovaj na praciahu miesiaca pakinuć Biełaruś, zabaraniŭšy joj naviedvać krainu ŭ bližejšyja try hady. Abskardžańnie rašeńnia praduhledžvaje prypynieńnie pradpisańnia ab vysyłcy na try miesiacy. Na abskardžańnie ŭ kožnaj z praduhledžanych instancyj dajecca miesiac.

28 listapada minułaha hoda pravaabaronca abskardziła rašeńnie ŭ HUUS Minharvykankama, što dazvoliła joj na 30 dzion padoŭžyć rehistracyju na časovaje znachodžańnie ŭ Biełarusi. 12 śniežnia staličnaja milicyja admoviła ŭ zadavalnieńni skarhi.

Tankačova źjaŭlajecca hramadziankaj Rasiei, ale žyvie ŭ Biełarusi kala 30 hadoŭ, maje tut nieruchomaść i stałuju pracu. Na praciahu 20 hadoŭ jana i kiravany joj Centr pravavoj transfarmacyi akazvajuć prafiesijnuju jurydyčnuju i ekśpiertnuju padtrymku niekamiercyjnym arhanizacyjam Biełarusi, a taksama ŭ situacyjach z parušeńniami pravoŭ čałavieka. Padstavaj dla rašeńnia ŭładaŭ stali fakty niaznačnaha pieravyšeńnia chutkaści aŭtamabilem Tankačovaj, zafiksavanyja videakamierami.

Siem tysiač podpisaŭ, sabranyja hramadskimi aktyvistami pad prośbaj nie vysyłać Tankačovu z krainy, na rašeńnie ŭładaŭ nie paŭpłyvali. Pradstaŭniki hramadzianskaj supolnaści ličać dziejańni ŭładaŭ niepraparcyjnaj i palityčna matyvavanaj sankcyjaj, źviazanaj z prafiesijnaj dziejnaściu pravaabaroncy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?